Astanada qandaı medıtsınalyq nysandar salynady

ASTANA. QazAqparat – Aldaǵy jyldary Astanada birneshe medıtsınalyq nysan salynady. Onyń qatarynda ambýlatorlyq keshen, perınataldy ortalyq, dıagnostıkalyq keshen jáne emhanalar bar. Búginde keıbiriniń qurylysy bastalyp ketti, dep habarlaıdy QazAqparat tilshisi qalalyq Qoǵamdyq densaýlyq saqtaý basqarmasynyń málimetine silteme jasap.

«Búgingi tańda elorda aýmaǵynda densaýlyq saqtaý salasy nysandary ınfraqurylymyn damytý jumystary qyzý júrip jatyr. Bıyl quny 21,5 mlrd teńgeni quraıtyn 3 nysannyń qurylysy aıaqtalady. Ol patologoanatomııalyq bıýro, «Nurly jol» vokzaly aýdanynda 1 sátte 500 adamdy qabyldaı alatyn ambýlatorlyq keshen jáne dál sondaı ambýlatorlyq keshen Sh.Beısekov kóshesi boıynda da salynyp jatyr», - delingen basqarma habarlamasynda.

Aqparatta aıtylǵandaı, joǵaryda atalǵan medıtsınalyq nysandar ınvestıtsııa qarajatyna salynyp jatyr.

«Odan bólek, qurylysy 2024-2025 jyldary aıaqtalatyn 10 medıtsınalyq nysan salý josparlanyp otyr. Onyń ishinde 3-i respýblıkalyq bıýdjet qarajatyna salynbaq. Atap aıtqanda, 200 orynǵa arnalǵan 2 perınataldy ortalyq (Almaty jáne Saryarqa aýdandarynda salynady) jáne Óndiris turǵyn úı alabynda aýysymyna 250 adamdy qabyldaıtyn ambýlatorlyq keshen. Sonymen qatar jergilikti bıýdjet esebinen taǵy 2 nysan salynady. Ol №2 qalalyq kópsalaly aýrýhananyń qabyldaý-dıagnostıkalyq kesheni jáne №8 qalalyq emhananyń eresekter men balalar korpýstaryn jalǵaıtyn ótkel salynady», - deıdi vedomstvodan.

Sondaı-aq jeke ınvestıtsııa tartý arqyly 36 mlrd teńgege 5 emhana salynatyny aıtyldy.

«Olardyń qatarynda Telman turǵyn úı alabynda aýysymyna 500 adamdy qabyldaýǵa arnalǵan ambýlatorlyq keshen, Prıgorodnyı turǵyn úı alabynda aýysymyna 150 adamdy qabyldaýǵa arnalǵan ambýlatorlyq keshen, Internatsıonalnyı turǵyn úı alabynda aýysymyna 150 adamdy qabyldaýǵa arnalǵan ambýlatorlyq keshen, Jaǵalaý turǵyn úı alabynda aýysymyna 250 adamdy qabyldaýǵa arnalǵan ambýlatorlyq keshen jáne «Capital park» turǵyn úı kesheninde aýysymyna 250 adamdy qabyldaýǵa arnalǵan ambýlatorlyq keshen», - delingen resmı aqparatta.

Odan bólek, №3 kópbeıindi qalalyq aýrýhana (burynǵy temirjol aýrýhanasy) ǵımaratynyń apatty jaǵdaıda ekenin eskerip, onyń ornyna Aqan seri men Eńlik-Kebek kósheleri qıylysynda jańa aýrýhana salý týraly sheshim qabyldanǵan.

Sonymen qatar qazirgi ýaqytta Abylaı han dańǵyly men Qobda qysqa kóshesi qıylysynda perınataldy ortalyq qurylysynyń jobasy – memlekettik saraptamadan ótkizilip jatyr.

Buǵan deıin Astanada medıtsınalyq mamandyqtarǵa bólinetin grant sany artatyny jáne medıtsına qyzmetshilerine arnalǵan jataqhana salynatyny týraly habarlaǵan edik.