Astanada qandaı qurylystar salynady
ASTANA. QazAqparat - Bas qalanyń bolashaqta qalaı salynaty týraly «Astana bas jospary» ǴZJI» JShS-niń bas sáýletshisi Arsenıı Pırojkov aıtyp berdi, dep habarlaıdy Elorda Info.
Buǵan deıin Astana ákimdigi jalpy aýdany 3300 gektar bolatyn qalanyń bolashaqtaǵy qurylysynyń tórt perspektıvti aımaǵyn bekitken bolatyn. Sondaı-aq qalanyń eski bóligin renovatsııalaý baǵdarlamasy bekitildi.
Birinshi aımaq - Myńjyldyqtar alleıasy, qurylys aýdany Beıbitshilik jáne kelisim saraıynan jańa «Nurly jol» temirjol vokzalyna deıingi aýmaqty qamtydy. Qazirgi kúni Astana qalasynyń Sáýlet, qala qurylysy jáne jer qatynastary basqarmasy saıabaq keńistigi men ortalyq alleıanyń jobasyna konkýrs jarııalady.
«Bul qazir ınvestorlar jumys istep jatqan óte úlken aýdan: árqaısysy jeke joba jasap, sáýletshilermen jumys isteýde. Bul aımaqta jappaı qurylys júrgizilip, Nurjol býlvary sııaqty bolady. Bes jyldyń ishinde biz kóptegen ózgeristerdi kóretin bolamyz», - dedi bas sáýletshi.
Onyń aıtýynsha, ınvestorlar turǵyn úıler men bıznes ortalyqtar salady.Ekinshi aımaq Turan dańǵylynyń boıynsha «Han Shatyr» OSO-nyń artynda «Jaǵalaý» shaǵyn aýdanyna deıin bolady. Bul aımaq Qabanbaı batyr men Turan dańǵyldary arasyndaǵy Astana Arena, Barys Arena, Alaý jáne «Saryarqa» velotregin qamtıtyn «Sport City» aýdanymen qıylysady.
«Biz bul aýdandy «Sport City» dep atadyq, sebebi bul jerde birneshe sport nysandary bar. Aıta keteıik, bul aımaq býlvarlyq aınalymǵa dóp keledi, «Sport City» Botanıkalyq baq pen Kishi Taldykól kóline qarama qarsy ornalasqan», - dedi ol.
Taldykól jáne Kishi Taldykól kólderiniń aýmaǵy aldaǵy ýaqytta abattandyrylady, bul aýdannyń turǵyndary jaǵalaýda serýendep, saıabaq pen gúlzarda demalý múmkindigine ıe bolady. Qazir ol jerlerde saıajaı telimderi ornalasqan. Olardyń ornyna tómen qabatty jaıly ortany qalyptastyrý kózdelgen. Birinshi qabattarynda qyzmet kórsetý oryndary, al joǵary qabattarynda teatr, galereıa men meımanhanalar bolady.
«Biz Maıbalyq kóline aparatyn jol salyp, aýmaǵyn Botanıkalyq baqtyń aýmaǵymen baılanystyryp, bolashaqta barlyq nysandy sonyń boıynda salý qajet dep oıladyq. Búgingi kúni aýmaqtyń barlyq jerine sport nysandary salynǵan, turǵyn úı alaptary joq. Sol sebepti adamdar únemi júrmeıtin jer jaǵymsyz, qarapaıym tilmen aıtqanda krımınaldyq sıpatqa ıe bolady. Sol sebepti onyń aýmaǵyn adamdarǵa toltyryp, turǵyn aýdanǵa aınaldyrýdy qalaımyz. Buǵan qosa, biz birinshi ret bul aýdannyń úıleriniń qasbetterine qatysty talap qoıýdy kózdep otyrmyz. Buǵan deıin biz olaı istemegen bolsaq, búgin sol deńgeıge jettik», - dedi sáýletshi.
Buǵan qosa, ol bolashaqta «Sport City»-de shamamen 10 myń adam turatynyn atap ótti.
Úshinshi aımaq - Máńgilik el dańǵylynan «Astana» halyqaralyq qarjy ortalyǵyna deıingi aýmaq. Bul jerde úlken saıabaq pen jańa meshit salynady.
«Sáýlet basqarmasy bir jaǵynan Máńgilik el dańǵyly, al ekinshi jaǵynan Qabanbaı batyr dańǵylymen shekteletin saıabaq jobasyna baıqaý jarııalady. Ólshemi jaǵynan ol Botanıkalyq baqtan kishi bolady. Sonymen birge saıabaqtyń janynda 15 myń adamdyq jańa meshit ornalasady. Qaladaǵy eń úlken meshit osy jerde bolady», - dep qosty Arsenıı Pırojkov.
Telman kentinde boı kóteretin tórtinshi aımaq elordanyń polıortalyǵynyń biri bolady.
«Bul jerde Kereı jáne Jánibek handar kóshesiniń jalǵasy retinde jańa kóshe boı kóteredi. Eski Telman kentiniń janynda jasyl jelegi kóp jańa zamanaýı shaǵyn aýdan paıda bolady. ıAǵnı, ol qıylystaǵy jınaqy shaǵyn aýdan bolmaq», - dedi ol.
Qalanyń damýyndaǵy jańa vektordyń biri polıortalyqtyq. Turǵyndardyń jaılylyǵy úshin elordanyń oń jaǵalaýyndaǵy ákimdiktiń janynda, Nurjol jáne Ekspodan bólek, birneshe polıortalyqtar qalyptasady.
«Bolashaqta polıortalyqtardy vokzal, Beısekova pen Qorǵaljyn tasjoly, Tilendıev pen Beısekova kósheleriniń qıylysy jáne Telman kentiniń aýmaǵynda jasaýdy josparlap otyrmyz», - dedi maman.
Bul qalanyń oń jaǵalaýynan sol jaǵalaýyna qatynaıtyn kólik trafıgin azaıtýǵa múmkindik beredi. Turǵyndarǵa saýda jasap, sportpen shuǵyldanyp, kóńil kóterý úshin bir aýdannan ekinshisine baryp júrý qajettiligi bolmaıdy.
Sáýletshiniń sózinshe, S-409 kóshesindegi jańa meshittiń aýdanyndaǵy jaǵalaýdyń qurylysy bastalyp ketti.
«Jańa meshittiń aýdanyndaǵy jeke sektordy kúreý kózdelgen, biraq bul máseleniń sheshimi ınvestorlarǵa baılanysty. Josparda ádemi aımaqtar, qalalyq jaǵajaı, ózen porty men pırs salý kózdelgen», - dedi ol.
«Astana bas jospary» mekemesiniń bul jobany júzege asyrýy qalalyq bıýdjetke baılanysty, sebebi ózen arnasyn keńeıtý jumystaryn júrgizý qajet.
Arsenıı Pırojkov qazirgi kúni qala shekarasyn shekteý baǵdarlamasy baryn atap ótti.
«Jaqynda qalanyń shekarasyn ıgerý qaýlysy bekitildi jáne endi biz qurylysty sonyń ishinde júrgizemiz. Qalanyń ishindegi apatty úılerdi kúreýdi kózdeıtin joba bar», - dedi sáýletshi.
