Astanada qandaı dárigerler jetispeıdi
ASTANA. QazAqparat - Astana qalasynyń Qoǵamdyq densaýlyq saqtaý basqarmasy basshysynyń orynbasary Jazıra Emberdıeva elordada qandaı dárigerlerdiń jetispeıtinin atady, dep habarlaıdy QazAqparat tilshisi.
«Qazirgi tańda kadr tapshylyǵy máselesi baryn túsinip otyrmyz. Ásirese, keıbir aýrýhanalarda neonatologtar men anestezıologtar, reanımatologtar men ota jasaıtyn akýsher-gınekologtar, okýlıster men otolarıngologtardyń jetispeýshiligi seziledi», - dedi Jazıra Emberdıeva Astanada ótken baspasóz máslıhatynda.
Qoǵamdyq densaýlyq saqtaý basqarmasy ókiliniń aıtýynsha, jekelegen profıl boıynsha kadrlardyń jetispeýshiligi bar. Degenmen, medıtsınalyq mekemelerde basqa dárigerler boıynsha másele joq.
«Dárigerlerdiń júktemesiniń kóp bolýy dál osy bilikti kadrlardyń jetispeýshiliginen bolyp otyr. Astanada dárigerlerdiń qabyldaýynda bolý merzimin barynsha qysqartýǵa kúsh salyp jatyrmyz. Osyǵan baılanysty elimizdegi birqatar joǵary oqý oryndarymen memorandýmǵa qol qoıdyq. Sonymen qatar, kadr jetispeýshiligi máselesin birjaqty etý úshin jas mamandarǵa arnap bos oryndar jármeńkesin turaqty túrde ótkizip kelemiz», - dedi Jazıra Emberdıeva.
