Astanada qandaı aýqymdy jol jobalary júzege asyp jatyr
ASTANA. KAZINFORM — Astana qalasynyń Kólik jáne jol-kólik ınfraqurylymyn damytý basqarmasy qala joldaryn salý jáne jóndeý boıynsha aýqymdy jumys júrgizdi.
Kólik jelisiniń sapasy men qaýipsizdigin arttyrýǵa baǵyttalǵan jobalardy iske asyrý aıasynda iri jobalar boıynsha mynandaı jumys isteldi.
1. Kúıshi Dına kóshesiniń M.Jumabaev kóshesinen Abylaı han dańǵylyna deıingi bóliginiń qurylysy aıaqtaldy. Joba aıasynda jol jabyny tóselip, jaryqtandyrý ornatyldy, avtoturaq oryndary jasaqtaldy jáne qozǵalysty retteıtin barlyq qajetti belgi qoıyldy.
2. Áıteke bı kóshesinde Syǵanaq kóshesinen Q.Muhamedhanov kóshesine deıin kólik qozǵalysy qamtamasyz etildi. Joba jumysy jalǵasyp jatyr, ýaqytsha belgiler ornatylǵan. Bıyl qazan aıynyń sońyna deıin baǵdarsham nysandaryn ornatý josparlanyp otyr. Barlyq jumys jobalyq qujattamaǵa tolyq sáıkes júrgizilýde.
3. Sh.Qaldaıaqov kóshesiniń Táýelsizdik dańǵylynan Arys kópirine deıingi bóliginde jol jabynyn jóndeý jumysy júrgizildi.
4. Á.Bekturov kóshesiniń qurylysy aıasynda (Turan dańǵylyna shyǵý bóligi) Á.Bekturov kóshesi men Turan dańǵylynyń qıylysynda baǵdarsham ornatyldy. Kóshe jaryqtandyrylyp, jol tańbalary syzyldy, irgeles aýmaq abattandyryldy.
5. T.Rysqulov kóshesinde Máńgilik El dańǵylynan Nura arnasyna deıingi ýchaskede kólik qozǵalysy ashyldy. Joba aıasynda jaıaý júrginshi joldary men velojolaqtar, baǵdarshamdar jáne zamanaýı kóshe jaryqtandyrý júıesi qarastyrylǵan.
6. EK-32 kóshesinde Tóle bı kóshesinen «Han Shatyr» SOO-ǵa deıingi qozǵalys qamtamasyz etildi.
7. Q.Qaısenov kóshesinde Uly Dala dańǵylynan Buqar jyraý kóshesine deıingi bólikte jumys jalǵasyp jatyr. Bıyl qazan aıynyń sońyna deıin bul ýchaskede kólik qozǵalysyn ashý josparlanǵan.
8. Buqar jyraý kóshesiniń Ál-Farabı dańǵylynan Joshy han kóshesine deıingi bóliginde jańartý jumysy qarqyndy júrip jatyr. Qurylys, jaryqtandyrý jáne jol ınfraqurylymyn jańartý nátıjesinde kóshe zamanaýı ári yńǵaıly kelbetke ıe bolyp otyr.
9. №117 jańa mektepke Tóle bı kóshesinen bastalatyn EK-13 kóshesi arqyly yńǵaıly kireberis qamtamasyz etildi.
Atalǵan sharalar jol qozǵalysynyń jaılylyǵy men qaýipsizdigin arttyrýǵa, kólik qozǵalysynyń jyldamdyǵyn jáne qalalyq ınfraqurylymnyń sapasyn jaqsartýǵa baǵyttalǵan.
Basqarma bekitilgen josparlarǵa sáıkes aýqymdy jobalardy iske asyrýdy jalǵastyryp, elorda turǵyndary men qonaqtary úshin zamanaýı ári qolaıly kólik ortasyn qalyptastyrýdy kózdeıdi.
Aıta ketelik Astanada ıgerilmegen jer ýchaskesi memleket menshigine qaıtarylǵan edi.