Astanada qandastarǵa arnalǵan qaıyrymdylyq shara ótti
ASTANA. KAZINFORM — Dúnıejúzi qazaqtary qaýymdastyǵynyń Astana qalalyq fılıaly qasıetti Oraza aıynyń qurmetine shetelden kóship kelgen qandastarǵa arnap qaıyrymdylyq sharasyn uıymdastyrady.

Іs-shara aıasynda kásipker azamattardyń demeýshilik jasaýymen jańadan kóship kelgen, turmysy nashar kópbalaly jáne kómekke muqtaj 20 shaqty otbasyǵa un, kúrish, jumyrtqa, suıyq maı, kartop syndy ónimderi bar azyq-túlik sebetteri taratyldy.

— Ramazan aıy — qaırymdylyq, izgilik jasaıtyn, adamdarǵa meırim baǵyshtaıtyn qasıetti aı. Biz osy oraıda shetelden kelip qonystanyp jatqan qıynshylyǵy bar otbasylarǵa az da bolsa kómekteseıik dep sheshtik. Qandastarǵa qoldaý kórsetý — barshamyzdyń ortaq mindetimiz. Aǵaıyndarǵa meıir baǵyshtaý jáne olarǵa elimizdiń, halqymyzdyń meıirin sezindirýdiń máni zor dep oılaımyn, — dedi Dúnıejúzi qazaqtary qaýymdastyǵynyń Astana qalasy fılıalynyń basshysy Ǵalym Úlkenbaıuly.

Aıta keteıik, 1991 jyldan beri Qazaqstanǵa 1 mln 128 myńnan asa etnıkalyq qazaq oraldy. Memleket tarapynan olardy qoldaý maqsatynda túrli baǵdarlamalar iske asyrylyp, beıimdelýge jaǵdaı jasalyp keledi. Ótken jyly Qazaqstan azamattyǵyn 20,2 myń adam aldy.

Onyń ishinde 15,6 myńy nemese 77% qandas. Bul 2023 jylmen salystyrǵanda 25%-ǵa az. 2023 jyly 26 828 adam Qazaqstan azamattyǵyn alǵan edi. Onyń 20,5 myńy — qandas bolǵan. Kóship kelgenderdiń teń jartysy Ózbekstannan kelgen. Qalǵany — Qytaı, Mońǵolııa, Túrikmenstan, Reseı jáne basqa da memleketten qonys aýdarǵandar.
Buǵan deıin, sońǵy jyldary Qazaqstan azamattyǵyn alýshylar sany 25 paıyz azaıǵanyn jazǵan edik.