Astanada «Qamqorlyq» qaıyrymdylyq sharasy ótedi
ASTANA. Qańtardyń 16-sy. QazAqparat - Qańtardyń 15-i men aqpannyń 15-i aralyǵynda Astana qalasy Bilim basqarmasynyń qyzmetkerleri men pedagogtary ishki ister organy qyzmetkerlerimen birlese otyryp dástúrli «Qamqorlyq» qaıyrymdylyq sharasyn ótkizedi,
dep habarlaıdy QazAqparat Astana ákimdiginiń saıtyna silteme jasap.
Jalpyǵa mindetti oqýmen tolyq qamtý aılyǵy aıasynda ótetin bul sharanyń maqsaty - kúnkórisi nashar, kópbalaly jáne turmysy tómen otbasylardan shyqqan balalarǵa, jetim balalar men ata-anasynyń qamqorlyǵynsyz qalǵan balalarǵa áleýmettik kómek jáne qoldaý kórsetý bolyp tabylady.
Aktsııa barysynda mamandar táýekel tobyndaǵy januıalardy aralaıdy, olardyń materıaldyq jáne turmys jaǵdaılaryn qarap, panasyz, qaraýsyz qalǵan balalardy, jaısyz otbasylar men az qamtylǵan januıadan shyqqan balalardy, materıaldyq kómek qajet etetin jáne áleýmettik sebepterge baılanysty mektepke barmaı júrgen balalardy anyqtaıdy. Pedagogtar oqýshylar men olardyń ata-analaryn jalpy oqytýmen qamtýdy júzege asyrý boıynsha normatıvtik qujattarmen tanystyrady. Al balalarǵa kómek retinde osy muqtaj otbasylarǵa materıaldyq kómek kórsetýge baǵyttalǵan qaıyrymdylyq qyzmetin júzege asyrýǵa jurtshylyqty, metsenattar men demeýshilerdi tartý sharalaryn uıymdastyrady.
Mektepterde aktsııa boıynsha synyp saǵattary, dóńgelek ústelder, qaıyrymdylyq kontsertteri, jármeńkeler uıymdastyrylady.
Ákimdiktiń baspasóz qyzmetiniń habarlaǵanyndaı, «muqtajdarǵa barlyq tilek bildirýshiler kómek kórsete alady jáne tıisti aqparatty 55-69-74 telefonyna habaralasý arqyly alady».
