Astanada «Qamqorlyq» aktsııasy aıasynda 300-ge jýyq búldirshinge tátti-dámdiler taratyldy

ASTANA. QazAqparat - Astanada respýblıkalyq «Qamqorlyq» aktsııasy aıasynda turmysy tómen jáne kóp balaly otbasylardan shyqqan 266 balaǵa tátti-dámdiler túrinde áleýmettik kómek kórsetildi. Bul týraly astana.kz saıtyna qalalyq Balalardyń quqyqtaryn qorǵaý basqarmasynan habarlady.

«Respýblıkalyq «Qamqorlyq» aktsııasy aıasynda turmysy tómen jáne kóp balaly otbasylardan shyqqan 266 balaǵa tátti-dámdiler túrinde áleýmettik kómek kórsetildi», - dep habarlady vedomstvodan.

Tartýlar № 21,№23,№33,№34,№49 jáne №55 mekteptiń oqýshylaryna taratyldy.

Aıta keteıik, is-shara elordalyq Balalardyń quqyqtaryn qorǵaý basqarmasy men «Dar» qaıyrymdylyq qorymen birlesip uıymdastyryldy.

Eske salaıyq, «Qamqorlyq» aktsııasy muqtaj balalarǵa materıaldyq kómek kórsetý maqsatynda 10 qańtar - 10 aqpan aralyǵynda ótkiziledi. Aktsııa aıasynda turmysy tómen jáne kóp balaly otbasylardan shyqqan 3 000 jýyq balaǵa kómek kórsetý kózdelgen.