Astanada kámeletke tolmaǵandardyń quqyqtaryn qorǵaý sharalarynyń tıimdiligine baılanysty semınar-keńes ótti

Atalmysh shara kámeletke tolmaǵandardyń isimen aınalysatyn polıtsııa ınspektorlary men áleýmettik pedagogtardyń, bilim berý salasy mamandarynyń qyzmetinde jasóspirimderdiń quqyqtary men zańdy múddeleriniń buzylýyna jol bermeý maqsatynda uıymdastyrylyp otyr. Jıyn barysynda kámeletke tolmaǵandar men olardyń ata-analary qatysýshy bolyp tabylatyn ister boıynsha ózekti degen máseleler talqyǵa tústi.

Jıynda osy baǵytta keltirilgen málimetterge qaraǵanda, búginde ishki ister organdarynyń kámeletke tolmaǵandardyń isteri jónindegi bólimsheleriniń esebinde 555 jasóspirim tur. Olardyń 33-i shartty túrde sottalǵan bolsa, 39-y kámelettik jasqa tolmaýyna baılanysty qylmystyq jazadan bosatylǵan. Semınarda prokýratýra ókilderi kámeletke tolmaǵandardyń isterine qatysty birqatar problemalar jóninde de áńgimeledi.

Astana qalalyq prokýrorynyń aǵa kómekshisi Olga Ionovanyń aıtýynsha, búginde óziniń ata-analyq mindetterin oryndamaı júrgen azamattardy jaýapqa tartý mindetin mektep ınspektorlary talapqa saı atqara almaı otyr. Birinshiden, mektep ınspektorlary ata-analyq mindetterin oryndamaǵan azamattardy jaýapqa tartý jáne isti sotqa joldaý úshin qajetti qujattardy tolyq jınaı almaıdy. Keı jaǵdaıda olar sotqa qajetti qujattardy daıyndaýdy tym uzaqqa sozady. «Onyń basty sebebi ınspektorlar jekelegen zańdar men olardyń baptaryn bile bermeıdi. Al «Neke jáne otbasy týraly» zańdy mektep ınspektorlary da, áleýmettik pedagogtar da jaqsy bilýleri kerek», -deıdi prokýrordyń kómekshisi».

Al ishki ister organdarynyń ókilderi arnaıy esepte turǵan kámeletke tolmaǵandarmen saýyqtyrý sharalaryn tolyqqandy júrgizbeıdi. Sonymen qatar olar quqyqbuzýǵa beıim balalardy erte bastan anyqtap, tıisti shara qoldaný jumystarynda da salaqtyq tanytyp otyr.