Astanada kámeletke tolmaǵan qyzdardy jezókshelikpen aınalysýǵa májbúrlegen azamatshaǵa jaza kesildi
ASTANA. QazAqparat - Astana qalasynyń turǵyny A. esimdi azamatsha kámelet jasyna tolmaǵanyn qyzdardy jezókshelikpen aınalysýǵa eriksiz túrde májbúrlegen. Aýdanaralyq sot úkimimen ol 5 jyl merzimge bas bostandyǵynan aıyryldy, dep habarlaıdy Astana qalasy Almaty aýdanynyń prokýratýrasynan.
2013 jyldyń jeltoqsan aıynan 2014 jyldyń aqpan aıyna deıin Astana qalasynyń turǵyny A. esimdi azamatsha jasóspirim 13 jáne 16 jasar qyzdardy olardyń kámelet jasyna tolmaǵanyn bile tura, jezókshelikpen aınalysýǵa eriksiz túrde májbúrlegen.
Jasóspirim qyzdar Astana qalasynda haýyzdarda ıntımdik qyzmet kórsetken. A. esimdi azamatsha jasóspirim qyzdardy kólikpen ákelip, olar qyzmetin kórsetkennen keıin, tapsyrys berýshilerdiń aqshasyn ózi alǵan.
«Jábirlenýshi qyzdar birneshe ret aınalysyp otyrǵan isterin toqtatpaqshy bolǵan, alaıda sottalýshy turaqty tabys kózinen aıyrylǵysy kelmeı, olardy qorqytyp, jezókshelikpen aınalasýǵa májbúrlegen jáne olardy 2,5 aıdan astam ýaqyt boıy páterlerde qınap ustaǵan», - dep atap ótti prokýratýrada.
Atalǵan fakti boıynsha qozǵalǵan qylmystyq is Almaty aýdandyq prokýratýrasymen baqylaýǵa alynyp, qaraý úshin sotqa joldanǵan. Astana qalasynyń aýdanaralyq kámelet jasyna tolmaǵandar isteri jónindegi sotynyń úkimimen azamatsha A. QR QK-niń 132-1 babynyń 2 bóligimen aıypty dep tanylyp, 5 jyl merzimge bas bostandyǵynan aıyryldy.
