Astanada qalta urylaryn ustaý úshin avtobýstar beınetirkegishtermen jabdyqtalýda
ASTANA. QazAqparat - Qaltaǵa túsetin urylardy ustaý úshin elordadaǵy qoǵamdyq kólikterge beınetirkegishterdi ornatýǵa erekshe mán berilip otyr. Bul týraly búgin Zańdylyqty, quqyqtyq tártipti jáne qylmysqa qarsy kúresti qamtamasyz etý boıynsha Astana qalasy Úılestirý keńesiniń kezekti otyrysynda Astana qalasy prokýrorynyń birinshi orynbasary Tımýr Súleımenov málim etti.
«Qylmystardyń 12 paıyzyna deıin qoǵamdyq kólikter men olarǵa baılanysty nysandarda jasalady. Osyndaı qylmystardyń sýbektileri uıymdasqan qylmystyq toptarǵa kiretin ákki qylmyskerler bolyp tabylady. Sonymen birge qaltaǵa túsetin osy qylmyskerlerdiń bolmashy bóligi ǵana ustalyp, qylystyq jaýapkershilikke tartylǵan»,-dedi T. Súleımenov.
Osy oraıda ol qoǵamdyq kólikterdiń ishin beınetirkegishtermen jabdyqtaý sheshimi jasalǵandyǵyn jetkizdi.
«Qazirgi kezde osyndaı beınetirkegishtermen 320 avtobýs jabdyqtaldy, al 2017 jylǵa deıin myńǵa deıin qoǵamdyq kólikke ornatý josparlanyp otyr. Búginde osy jumystardyń alǵashqy nátıjeleri baıqaldy»,-dedi T. Súleımenov.
Onyń sózine qaraǵanda, bıylǵy 10 aıda Astananyń quqyq qorǵaý organdaryna quqyq buzýshylaqtar týraly 166 myń habarlama kelip tústi. Bul kórsetkish ótken jyldyń sáıkes kezeńindegi aryzdardan 7,7 paıyzǵa artyq, ıaǵnı ol kezde 155 myń aryz bolǵan edi»,-dedi T. Súleımenov.
