Astanada qalpyna keltirilgen saq, ǵun, sarmattardyń kóne jádigerleri kórmege qoıyldy
ASTANA. 20 maýsym. QazAqparat - Búgin Astanada saq, ǵun, sarmattardyń kóne jádigerlerin qalpyna keltirgen ataqty restavrator, QR Mádenıet qaıratkeri, QR Sýretshiler Odaǵynyń múshesi Qyrym Altynbekovtyń «Kóshpendiler álemi» atty kórmesi ashyldy.
QR Tuńǵysh Prezıdentiniń murajaıynda ótken kórme ekspozıtsııasyna birneshe ondaǵan rekonstrýktsııalar, kóshpendiler dúnıetanymynyń syryn ashatyn, birneshe myńdyq tarıhy bar zergerlik buıymdar, at ábzelderi men qarý-jaraq úlgileri qoıylǵan. Sonyń ishinde Esik qorǵanynan shyqqan «Altyn adam», Araltóbe qorǵanynyń «Sarmat kósemi», «Berel» qorǵanynan tabylǵan arheologııalyq qazbalar, saqtardyń salttyq qazany, ǵundardyń zergerlik buıymdary, Túrik ımperııasynyń baıraǵy, saq kóseminiń baıraǵy, han jubaılarynyń kıim-keshekteri elorda jurtshylyǵynyń nazaryna usynylǵan.
«Men kórmege eńbekterimniń tek 10 paıyzyn ǵana usynyp otyrmyn. Óıtkeni olardyń barlyǵyn elordaǵa alyp kelý múmkin bolmady. Munda bizdiń eldiń tarıhy, mádenıeti qandaı bolǵanyn zat túrinde tanyp, onyń alǵashqy kúıi men restavratsııadan ótkennen keıingi qalpyn kóre alasyzdar», - deıdi Q. Altynbekov.
«Táýelsizdigimizdiń arqasynda biz joǵalyp ketýge shaq qalǵan baǵzy muralarymyzdy qaıta jandandyryp, qaıtadan túletýge múmkindik aldyq. Bul jerde men qola dáýirden búgingi zamanǵa deıingi Uly dala tarıhyn kórsetkim keldi», - dep atap ótti ol.
Skıfter, sarmattar men saqtar biz biletindeı, Eýrazııanyń ulan-ǵaıyr dalasyn bizdiń dáýirimizge deıingi birinshi myńjyldyqta mekendegen kóshpeli halyqtar. Gerodot olardy «altyn kúzetýshi» halyqtar, attarmen birigip ketken kentavrlar dep ataǵan.
