Astanada qaldyqtardy basqarý júıesi jańǵyrtylady
ASTANA. 5 qarasha. QazAqparat - Elordada qaldyqtardy qaıta óńdeý tereńdigin arttyrý (50% deıin) maqsatynda qoldanystaǵy qoqys óńdeıtin keshen bazasynda bıogaz qondyrǵysyn engizý múmkindigi qaralýda. Atalǵan qondyrǵy organıkalyq (taǵam) qaldyqtardy qaıta óńdep, balama energııa kózderin (jylý men elektr energııasyn) alýǵa jol beredi. Bul týraly astana.kz saıtyna Astana qalasy ákimi apparatynyń Ómirdi qamtý jáne ınfraqurylymdy damytý bóliminen habarlady.
«2012 jylǵy 24 jeltoqsan men 2013 jylǵy 1 qarasha aralyǵynda qoqys óńdeıtin keshende (QÓK) 149 613 tonna qatty turmystyq qaldyq qabyldanyp, 58 996 tonnasy brıkettelip, 78 236 tonna qatty turmystyq qaldyq shyǵaryldy. Qaıta óńdeý tereńdigi 8,27 % (12 380 tonna QTQ) qurady», - delingen habarlamada.
Aıta keteıik, búgingi tańda qalanyń sanıtarlyq jaǵdaıy men estetıkalyq qalpyn qoldaý maqsatynda apta saıyn bekitilgen ýchaskeler boıynsha konteıner alańdary men konteınerlerdi túgendeý jumysy qolǵa alynǵan, QTQ shyǵarý kestesi qaıta qaraldy, konteınerler tolyp ketken jerlerde reıster sany ulǵaıtyldy. Sonymen qatar, kóshelerdiń estetıkalyq qalpyn saqtaý úshin konteınerler aýlalardyń ishine ornatylyp jatyr.
Budan basqa, EKSPO-2017 halyqaralyq mamandandyrylǵan kórmege daıyndyq aıasynda 2014 jyly Tabıǵı resýrstar basqarmasy kommýnaldyq qaldyqtardy organıkalyq (taǵam) jáne turmystyq (aralas) qaldyqtar syndy eki negizgi tıpi boıynsha bólek jınaýdy uıymdastyryp, kezeń-kezeńmen qoldanystaǵy metall konteınerlerdi plastık konteınerlerge aýystyrýdy josparlap otyr.
