Astanada Qaldybektiń án keshi qalyqtady
ASTANA. Qyrkúıektiń 23-i. QazAqparat - Astanadaǵy «Kongress-Holl» saraıynda Qazaqstan Jastar odaǵy syılyǵynyń ıegeri, belgili sazger Qaldybek Qurmanáliniń shyǵarmashylyq keshi ótti, dep habarlaıdy QazAqparat.
Óner súıer qaýym daryndy sazgerdiń «Qarııalar azaıyp bara jatyr», «Kirmeshi jıi túsime», «Qııaldaǵy qalqa», «Án-aǵa nemese Shámshimen syrlasý», «Jaıyqtyń tolqyndary» jáne basqa da tamasha ánderin súısine tyńdap, qoshemetpen qol soqty.
Sazgerdiń tamasha ánderin Qazaqstannyń Halyq artısteri Maqpal Júnisova men Tuńǵyshbaı ál-Tarazı jáne belgili ánshiler Gúlmıra Aqúrpekova, Ádil Slamhan, Jeńis Ysqaqova, Saıat Medeýov, Tamara Asar, Tahmına Áshimbekova, Jubanysh Jeksenuly, Erkin Nurjan, Aıkerim Qalaýbaeva, Murat Toqashbaev, Eset Sádýaqasov, Ábdihan Beskempiruly jáne basqa da óner ıeleri kóermender nazaryna usyndy. «Kaspıı» tobynyń jigitteri de birneshe ándi shyrqap, tyńdaýshylardyń qurmetine bólendi.
Memlekettik syılyqtyń ıegeri, aqyn Farıza Ońǵarsynova sazger Qaldybek Qurmanálige izgi tilekterin aıtyp, óner jolyna tabys tiledi. Qazaqy yrym boıynsha jolyń ashyq, til-kózden aman júr dep tumar beınesindegi syılyqty tabys etti.
Elorda kórermenderi aldynda «Jas qazaq úni» gazetiniń Bas dırektory - Redaktorlar keńesiniń tóraǵasy, aqyn Qazybek Isa Qaldybekke arnaǵan óleńin oqyp berdi. «Án-aǵa jaıly ádemi ándi jazdyń da,
Shámshiniń aldyń eskegin!»,- dedi aqyn Q.Isa.
Bul kúni keıbir keshterdegideı dańǵur-duńǵyr áýenge jer tepkilegen ártister bolǵan joq. Ulttyq boıaýy mol kontsert boldy. Árbir kórermen án keshinen rýhanı baıyp, jany tynyǵyp, kóńili ósip otyrdy.
