Astanada qaldyqtardy energııaǵa aınaldyratyn ekopark jobasy iske qosyldy
ASTANA. KAZINFORM – Oljas Bektenov Shenzhen Energy Environment basshysy Van Ganmen qaldyqtardy kádege jaratý jáne ozyq ekostandarttardy engizý boıynsha yntymaqtastyqty talqylady. Bul týraly Úkimettiń baspasóz qyzmeti.
Premer-mınıstr Oljas Bektenov Aımaqtyq ekologııalyq sammıt — 2026 is-sharasyna qatysý úshin Astanaǵa kelgen qytaılyq Shenzhen Energy Environment Co., Ltd kompanııasynyń dırektorlar keńesiniń tóraǵasy Van Ganmen kezdesý ótkizdi.
Onda elimizdiń jańa Konstıtýtsııasynda bekitilgen Qorshaǵan ortany qorǵaý jónindegi normalarǵa jáne Memleket basshysynyń «Taza Qazaqstan» bastamasyna sáıkes ekologııa salasyndaǵy yntymaqtastyq jaıy talqylandy.
Búgin elordada qatty turmystyq qaldyqtardy kádege jarata otyryp, elektr energııasyn óndirýge arnalǵan «Astana energııasy» ekoparki» ınvestıtsııalyq jobasynyń birinshi kezeginiń qurylysy bastaldy. Jobaǵa $180 mln ınvestıtsııa salynady. Birinshi kezeńdi júzege asyrý sheńberinde kásiporynnyń qýaty táýligine 1,5 myń tonnadan astam qaldyqty quraıdy, al óndiriletin elektr energııasynyń kólemi 50 MVt bolmaq. Munda tehnologııalyq jáne ekologııalyq parametrlerge erekshe nazar aýdarylyp otyr, onyń ishinde qaldyqtardy tazartýdyń zamanaýı kóp satyly júıesin qoldaný bastamasy da bar. Osy maqsatta Astanada «East hope» JShS birlesken kásiporny quryldy. Nysandy paıdalanýǵa berý 2029 jyldyń maýsym aıyna josparlanyp otyr.
— Bizdiń memleketterimizdiń basshylary arasynda senimge qurylǵan qarqyndy dıalog ornyqqan, bul — birlesken ınvestıtsııalyq jobalardy júzege asyrý úshin negiz. Biz Qytaı tarapy men bızneske ekonomıkanyń damýyna qosqan úlesi úshin rızamyz jáne barlyq qajetti jaǵdaıdy jasaýǵa daıynbyz. «Astana energııasy» ekoparki» jobasy elorda úshin ǵana emes, el úshin de strategııalyq mańyzǵa ıe. Úkimet osy jobany júzege asyrý úshin barlyq qajetti qoldaý sharalaryn kórsetedi, — dep atap ótken Oljas Bektenov,
Energetıka mınıstrligi men ákimdikke osy tájirıbeni basqa óńirlerge keńinen taratý perspektıvalaryn qarastyrýdy tapsyrdy.
Shenzhen Energy Environment Co., Ltd dırektorlar keńesiniń tóraǵasy Van Gan kompanııanyń jobanyń ekinshi kezegin júzege asyrý nıeti bar ekeni týraly málimdedi, bul bolashaqta qatty turmystyq qaldyqtar polıgondarynda jınaqtalǵan qaldyqtardy tolyq joıýǵa múmkindik bermek. Búginde kompanııanyń portfelinde Qytaı Halyq Respýblıkasynyń aýmaǵynda ornalasqan jalpy qýattylyǵy táýligine 79 myń tonna bolatyn 57 qoqys jaǵatyn kásiporyn bar. Shenzhen Energy Environment Co., Ltd 20 mıllıonǵa jýyq halqy bar Shenchjen qalasyndaǵy qaldyqtardyń 90%-yn suryptap, kádege jaratyp otyr.
— Biz Qazaqstanda jumys isteý múmkindigin joǵary baǵalaımyz jáne jobany sapaly júzege asyrý úshin bar kúsh-jigerimizdi salýǵa daıynbyz. Kásiporyn Qytaı men Qazaqstan arasyndaǵy is júzindegi yntymaqtastyqtyń mańyzdy úlgisi bolatynyna senimdimin. Qazaqstan Úkimetiniń qoldaýymen jobany odan ári ilgeriletýdi josparlap otyrmyz, — dedi Shenzhen Energy Environment Co., Ltd dırektorlar keńesiniń tóraǵasy Van Gan.
Taraptar «Astana energııasy» ekoparki» eki el arasyndaǵy ınvestıtsııalyq jáne tehnologııalyq yntymaqtastyqtyń taǵy bir nátıjeli úlgisi bolatynyn atap ótti.
Sonymen qatar kómirmen jumys isteıtin JEO men gaz elektr stansalaryn ekologııalyq rekonstrýktsııalaý, sondaı-aq óndiristi lokalızatsııalaýdaǵy ózara is-qımyldyń keleshegi talqylandy.
Kezdesý sońynda taraptar jobany belgilengen merzimde júzege asyrýǵa jáne keleshegi zor baǵyttardaǵy yntymaqtastyqty odan ári damytý úshin barlyq kúsh-jigerin salýǵa nıetti ekenin jetkizdi.
Aıta ketelik Oljas Bektenov jeke kompanııalardy muqtaj adamdardy qoldaýǵa shaqyrǵan edi.
