Astanada qalanyń dızaın-kodyna sáıkes kelmeıtin 870 jarnama alyndy

ASTANA. QazAqparat - Astanada 2019 jyly bekitilgen elordanyń dızaın-kodyna sáıkes syrtqy jarnama men mańdaıshalardy retke keltirý boıynsha belsendi jumys júrip jatyr, dep habarlaıdy qalalyq ákimdiktiń resmı saıty.

Qazirgi ýaqytta bekitilgen dızaın-kodqa sáıkes kelmeıtin 870 jarnamalyq element ózgertildi.

Mundaı zań buzýshylyqtardy joıý úshin shaǵyn jáne orta bıznes ıelerine syrtqy jarnamany sáıkestendirý týraly habarlamalar taratylady.

Elordanyń ýrbanıstıka ortalyǵy mundaı syrtqy jarnama qalanyń kórkin buzyp, kelbetine nuqsan keltiretinin málim etti.

Mysaly «Kórkem» turǵyn úı kesheninde kóptegen kásipker ózderiniń qasbetin retke keltirýdi jón sanaıdy. Olar dızaın kodqa sáıkes kelmeıtin jarnamalar qalanyń jalpy kórinisi men úıdiń kórinisin buzady degen pikirde.

Astana qalasynyń ýrbanıstıka ortalyǵy mańdaıshalar boıynsha 130 eskızdik usynys ázirledi, syrtqy jarnama boıynsha 40-tan astam saýal pysyqtaldy.

Maqsat – syrtqy jarnamalardy retke keltirý, birtutas jáne tartymdy ortany qurý, sonymen qatar vızýaldy shýdy joıý.

Bul jumys qalanyń barlyq aýdanynda júrgiziledi.