Astanada qalamger, belgili aýdarmashy Amanǵalı Sultannyń 2 tomdyq «Skıfıada» atty tarıhı dastanynyń tusaýkeser rásimi ótedi
ASTANA. 4 qazan. QazAqparat. 2011 jyldyń 6 qazany kúni saǵat 19.00-de QR Prezıdenttik mádenıet ortalyǵynyń kontsert zalynda belgili qalamger, aýdarmashy Amanǵalı Sultannyń 2 tomdyq «Skıfıada» atty tarıhı dastanynyń tusaýkeser rásimi ótedi, dep habarlaıdy Prezıdenttik mádenıet ortalyǵynyń baspasóz qyzmeti.
Avtor «Skıfıada» tarıhı dastanyn jaryqqa shyǵarý úshin shırek ǵasyrdaı ýaqytyn jumsaǵan. Bul dastanda osydan eki myń alty júz jyldaı buryn ulan-baıtaq Eýrazııa keńistiginde ómir súrgen saq-skıf taıpalarynyń Mádı patsha bastaǵan jaýger jasaǵynyń Taıaý Shyǵysqa jasaǵan atyshýly joryǵy baıandalady. Osy ejelgi el-jurttyń tirshilik-turmys qalpy men salt-dástúri, onyń qazir kóne sanalatyn Egıpet, Qytaı, Vavılonııa, Assırııa, Iýdeıa-Izraıl, Gretsııa órkenıetimen qarym-qatynasy tilge tıek etiledi. Aqyn kóshpeli qaýymǵa tán erkindikke qushtarlyq pen órshil rýh, adamgershilik pen aǵaıynshylyq, erkek pen áıel arasyndaǵy súıispenshilik, dostyqqa adaldyq, qaharmandyq pen qaıyrymdylyq, ata-baba arýaǵyna qurmet pen týǵan oshaqtyń tútinine degen saǵynysh sııaqty máńgilik adamı asyl qasıetter jaıly tolǵanady. Kitaptyń eki tomy da jıyrma bes bólimnen turady.
Sultan Amanǵalı Saǵynuly 1936 jyly 5 jeltoqsanda Batys Qazaqstan oblysy, Aqjaıyq aýdany (burynǵy Chapaev), Talpyn aýylynda dúnıege kelgen. Máskeýdegi M. Gorkıı atyndaǵy Ádebıet ınstıtýtyn támamdaǵan soń, 1961 jyldan bastap Mádenıet mınıstrliginde, otandyq radıo, telearnalarda jumys isteıdi. 1975 jyldan bastap keńes úkimeti taraǵanǵa deıin SSRO Joǵarǵy Keńesi Prezıdıýmynda qyzmet atqarady.
Alǵashqy óleńderi 1958 jyly oblystyq «Ekpindi qurylys» gazetinde jarııalanǵan A. Sultan óleńder men poemalardan quralǵan birneshe jınaǵyn qazaq tilinde, «Antılopıa trava» atty jınaǵyn orys tilinde jaryqqa shyǵardy. V. Gıýgonyń «93-ı god» romanyn qazaqshalaǵan qalamger Reseı Jazýshylar odaǵynyń múshesi.
«Aıdyn shalqar» (1979), «Jazǵyturym jarshysy» (1984), «Keń dala» (1977), «Qutty meken» (1987), «Taltús» (1961) syndy jyr jınaqtarynyń avtory A. Sultanov týǵan el, jer, zamandastar jaıynda lırıkalyq óleńder jazǵan. Adam taǵdyry, mahabbat pen jastyq, zamandastarynyń oı-sezimi, maqsat-múddesi aqyn jyrlarynyń basty taqyrybyna aınalǵan.
Tusaýy kesilgeli otyrǵan «Skıfıada» tarıhı dastany aqynnyń sanaly ǵumyrynda alǵan eń bıik asýy, uzaq ta tabandy izdenisiniń qundy nátıjesi.
Іs-sharaǵa Prezıdent Ákimshiligi, Parlament depýtattary, QR Mádenıet mınıstrligi, BAQ ókilderi, sondaı-aq qala turǵyndary men qonaqtary shaqyrylyp otyr.
