Astanada qalalyq avtobýstar baǵyty ózgerýi múmkin

ASTANA. QazAqparat - Astanada qalalyq qoǵamdyq kóliktiń keı baǵyttary ózgerýi múmkin, dep habarlaıdy QazAqparat «Astana LRT» kompanııasyna silteme jasap.

«Qazirgi ýaqytta kún saıyn kólik baǵyttaryna taldaý júrgizip jatyrmyz, ózgerister bolýy múmkin. Qazirgi baǵyttarǵa aıaldamalar qosylady nemese kerisinshe, alynyp tastalýy múmkin. Biraq, 2018 jyly jańa baǵyttardy qosý josparymyzda joq», - dep jaýap berdi «Astana LRT» baspasóz hatshysy Naýat Azanbaeva QazAqparat saýalyna.

Onyń aıtýynsha, qazirgi ýaqytta qala ishinde 63 baǵyt júredi.

«2014 jylmen salystyrar bolsaq, qalada 45 baǵyt qana bolǵan edi. Bul óte jaqsy kórsetkish. Bizdiń qazirgi mindetimiz - qoldanystaǵy baǵyttardyń sapasyn jaqsartý», - dep atap ótti ol.

Sonymen birge,  N. Azanbaeva jolaýshylar tarapynan kóp synǵa ushyraǵan №60 baǵyttyń ózge avtoparkke beriletinin habarlady.

«Óte az júredi dep synalǵan №60 baǵyt buryn №2 avtoparkke tıesili edi, qazir ony memlekettik №1 avtoparkke berdik. Bul park ózin jaqsy qyrynan tanytyp úlgergen», - dedi N. Azanbaeva.