Astanada qalalyq ahýal ortalyǵy qurylady
ASTANA. QazAqparat - Astanada ústimizdegi jyldyń 1 mamyryna deıin qalalyq ahýal ortalyǵy paıda bolady. Bul týraly ákimdikte keńeıtilgen jumys májilisinde belgili boldy. Basty taqyryby qaladaǵy jaılylyq pen qaýipsizdikti qamtamasyz etý.
Sharaǵa QR Bas prokýrory Jaqyp Asanov, Astana ákimi Áset Isekeshov, sondaı-aq ortalyq memlekettik organdar, barlyq vedomstvolar, qala ákimshiliginiń qurylymdyq bólimsheleri, prokýratýra, ІІD, ulttyq qaýipsizdik organdarynyń basshylary qatysty.
Qalalyq ákimdiktiń baspasóz qyzmetinde habarlaǵandaı, «Astananyń jaılylyǵy men qaýipsizdigi» jospary elorda turǵyndary men qonaqtarynyń jaıly ómir súrýine qaýipsizdiktiń standarttaryn arttyrý úshin ázirlendi. Qujat 172 shara men eki bólimdi («Qaýipsizdik» jáne «Jaılylyq») qamtıdy. Birinshi bólimge qoǵamdyq qaýipsizdikti qamtamasyz etý, TJ jol bermeý, sonyń saldaryna ázirlik, ekonomıkalyq qaýipsizdik jatady. Ekinshi bólim - servıske, ómir sapasyna qanaǵattaný, týrıstik jaılylyq. Búginde tolyqtaı 19 tarmaq oryndaldy, qalǵan 99 shara iske asyrý satysynda.
Taraptar qaladaǵy birqatar problemalyq máselelerdi talqylady. Qala basshysy tıisti mınıstrlikter men vedomstvolar tarapynan sheshim qabyldaýdy qajet etetin ár blok boıynsha naqty usynystar engizdi.
Ákimniń aıtýynsha, 2017 jylǵy 1 mamyrǵa deıin problemalardy ońtaılandyrý jáne sheshý úshin elordanyń ІІD bas operatsııalyq ortalyǵynyń jumysymen ıntegratsııalanǵan qalalyq ahýal ortalyǵyn qurady. Jyl aıaǵyna deıin kúlli qala boıynsha polıtsııa qyzmetkerlerine jáne qalalyq qyzmetterge arnalǵan 10 myń kamera ornatylady.
