Astanada qalaǵa qajetti mamandyqtar kórmesi ashyldy
ASTANA. 25 qyrkúıek. QazAqparat - Astanadaǵy Kongress-Holl saraıynda elordaǵa qajetti mamandyqtar kórmesi, sondaı-aq bos oryndar jármeńkesi ashyldy.
Qos is-shara bıyl alǵash ret uıymdastyrylyp otyr. Ondaı bastamanyń negizgi maqsaty - mektep men kolledj túlekterin suranysy joǵary mamandyqtarmen tanystyra otyryp, jumysqa ornalastyrý. Kórmede 30-dan astam asa qajetti mamandyqtarmen tanysýǵa múmkindik bar. Al bos oryndar jármeńkesinde jas mamandarǵa 1 myńnan astam bos qyzmet oryndary usynylyp otyr.
«Búgingi tańda Astanaǵa qurylys salasynyń mamandary, onyń ishinde árleýshi, sylaqshy, usta, dánekerleýshi jáne taǵy basqalar aýadaı qajet. Sondaı-aq qyzmet kórsetý salasynda jumys isteı alatyn aspazshy, daıashy, barmen men menedjerler kóptep daıyndalsa eken deımiz. Jalpy, qazirgi kezde elordanyń qurylysyna 1 myńdaı maman qajet bolsa, medıtsınaǵa shamamen 200-deı qyzmetker kerek», - deıdi Astana qalasynyń Jumyspen qamtý jáne áleýmettik baǵdarlamalar basqarma bastyǵynyń orynbasary Oljas Omarov.
