Astanada qaladaǵy ómirdi jaqsartý ıdeıalaryn tanystyrý alańy ashyldy
ASTANA. QazAqparat - Astanada alǵash ret qalanyń belsendi turǵyndarynyń ıdeıalaryn tanystyrý alańy ashyldy. ASTANA IDEAS jobasyn «Astana Jastary» jastar resýrstyq ortalyǵy elorda ákimdiginiń qoldaýymen qalanyń máselelerine beıqam qaraı almaıtyn jastarǵa jáne onyń damýyna óz úlesin qosýǵa nıetti adamdarǵa arnap ázirlegen, dep habarlaıdy astana.kz.
Túrli baǵyttar boıynsha ıdeıalar Astana Mall saýda-oıyn-saýyq ortalyǵynda tanystyryldy. Kórermender men qazylar alqasynyń nazaryna mádenıet, sport, bilim, týrızm, ınfraqurylymdy damytý salalaryn qamtyǵan jeti jumys usynyldy. Sonyń ishinde kıim-keshek jınaýǵa arnalǵan áleýmettik konteınerler, telefondardy qýattaýǵa arnalǵan avtomattar, ydys qabyldaıtyn fandomattar bar. Keıbireýler qalada júzege asyrylyp jatqan jobalardy jaqsartý boıynsha usynystar engizdi - aıaldamalarda avtobýstardyń qozǵalysyn baqylaý, navıgatsııalyq aqparat beketterin ornatý.
Sondaı-aq, múmkindikteri shekteýli adamdarǵa arnalǵan sporttyq qurylǵylardy ornatý ıdeıasy da aıtyldy.
Árbir baıandamadan keıin qonaqtarǵa ózderin qyzyqtyrǵan máseleler boıynsha suraqtar qoıýǵa múmkindik berildi. Tanystyrylym avtorlary óz ıdeıalaryn iske asyrýdyń qarjylyq jaǵyn da eskergen.
Shaqyrylǵan qonaqtardyń qatarynda elordanyń Jastar saıasaty máseleleri basqarmasynyń, Astana Convention Bureau, Astana Innovations ókilderi jáne t.b. boldy. Shara sońynda eki spıkerge yntymaqtastyq týraly usynys jasaldy.
- Jobanyń basty mindetteri túrli baǵyttar boıynsha ıdeıalar jınaý, ákimdiktiń qoldaýymen úzdik ıdeıalardy damytýǵa jáne iske asyrýǵa áser etetin jaǵdaılardy taldaý bolyp tabylady. Bul - qanatqaqty joba, biraq bolashaqta qalany jaqsartý boıynsha kóptegen ıdeıalar usynylatynyna senimdimiz. Aldaǵy ýaqytta kem degende eki kezdesý ótkizý josparda bar, - dep habarlady «Astana jastary» jastar resýrstyq ortalyǵynyń jetekshisi Ánýar Nurpeıisov.
