Astanada qala kúnine oraı 2 mektep pen 2 balabaqsha ashylady
ASTANA. QazAqparat - Qala kúnine oraı Astanada jalpy bilim beretin 2 mektep ashylmaq. Bul týraly Astana qalasy ákimdiginiń baspasóz qyzmetinen habarlaıdy.
Mektepter oń jáne sol jaǵalaýda ashylady. Olardyń biri Túrkistan kóshesinde ornalasqan. Bul mektep 1200 orynǵa eseptelgen. Ekinshi mektep Sh.Qaldaıaqov kóshesinde ashylmaq.
Astanada sonymen birge mektepke deıingi bilim berýdi damytýǵa úlken kóńil bólinip otyr. Sebebi, Astana halqynyń sany jyl saıyn ósip keledi. Uzaq kezekte turmaı, árbir kishkentaı astanalyqty mektepke deıingi bilim berýmen qamtamasyz etý úshin elordada jyl saıyn jańa balalar baqshasynyń da sany kóbeıip keledi. Budan bólek, Astana kúnine oraı Panfılov jáne Toraıǵyrov kósheleriniń qıylysynda úsh qabatty 140 orynǵa shaqtalǵan bóbekjaı ashylady. Ol 2 jastan 7 jasqa deıingi búldirshinderge arnalǵan. Kishkentaı elorda turǵyndaryna Nájimedenov kóshesiniń boıyndaǵy 190 oryndyq «BI Village Comfort» atty taǵy bir jańa balabaqsha da tosyn syı etilmek. Bul ǵımarat ta úsh qabatty. Aıta keteıik, qazirgi tańda Astananyń jalpy bilim berý mekemeleriniń júıesinde 84 mektep bar, onyń 72-si - memlekettik mektepter, 12-si - jekemenshik bolyp tabylady. Onda 94 712 oqýshy bilim alyp, 6038 ustaz jumys jasaıdy. Qalada jalpy 148 balabaqsha men 25 shaǵyn ortalyq bar. Olarǵa barlyǵy 33 164 bala barady.
