Astanada Qala kúnine arnalǵan «Igi ister bıýrosy» biregeı jobasy iske qosylady

Bul týraly Astana qalasynyń 16 jyldyǵyna arnalǵan merekelik sharalardy daıyndaý jáne ótkizý jónindegi uıymdastyrý komıtetiniń medıa-shtabynan habarlady.

Joba kómekke muqtaj astana turǵyndaryna kez kelgen adam qol ushyn soza alatyn ǵalamtor-anyqtama retinde jumys istemek.

Ǵalamtor-anyqtama arnaıy silteme túrinde Astana qalasy ákiminiń www . astana . gov . kz . saıtynda «Igi ister bıýrosy» bólimine ornalastyrylady. Onda kez kelgen adam qarjylaı, tehnıkalyq, gýmanıtarlyq, volonterlik jáne basqa da kómekke muqtaj jandarǵa qolushyn soza alady. Atap aıtsaq, jetimder úıi, ınternat tárbıelenýshilerine, kópbalaly otbasylar, qaterli aýrýǵa dýshar bolǵan, qarjylaı qysylǵan nemese qarttarǵa jáne qoǵamnyń basqa da áleýmettik álsiz toptaryna kómektesýge múmkindik alady. Anyqtamada kómekke muqtaj jandardyń tikeleı baılanys nómirleri men qajettilikteri jazylady.

«Igi ister bıýrosy» aktsııasy aıasynda qaıyrymdy iske belsendi aralasqan azamattarǵa Astana qalasy ákimi atynan alǵys hattar beriledi.