Astanada qala kúnin merekeleýdi uıymdastyrý sharasyna 4 500-ge jýyq adam jumyldyrylǵan
ASTANA. QazAqparat - Qala kúnin merekeleýdi uıymdastyrý sharalaryna 4 500-ge jýyq adam jumyldyrylǵan. Bul týraly OKQ-de bolǵan baspasóz konferentsııasynda qalalyq Mádenıet basqarmasynyń basshysy Bolat Majaǵulov habarlady.
«Bıylǵy jyly ashyq alańdarda ótetin sharalardyń kóp bolýyna baılanysty uıymdastyrý jumystaryna 4 500-ge jýyq adam qatystyrylyp otyr. Olardyń arasynda ártister, stsenograftar, horeograftar, sondaı-aq eriktiler bar», - dedi B.Majaǵulov.
Bul rette eriktiler, onyń aıtýynsha, uıymdastyrý jumystaryna tegin qatysady. Esterińizge sala keteıik, bıylǵy jyly Astanada qala kúnin merekeleý aıasynda 70-ten astam shara ótedi. Elorda kúnin resmı merekeleý 4 shildede Memlekettik týdy saltanatty kóterý rásiminen bastalady. Merekelik sharalar dástúr boıynsha saltanatty otshashýymen aıaqtalady. Ony qalanyń birneshe bóliginen, atap aıtqanda Esil ózeniniń jaǵasynan, «Han Shatyr» saýda, oıyn-saýyq ortalyǵy alańynan jáne Abylaı han dańǵyly men Pýshkın kóshesiniń qıylysyndaǵy saıabaqtan kórýge bolady.
