Astanada qala kúnin atap ótý jalǵasýda

«Jastar» saraıy, «Qazaqstan» sport kesheni, «Jeruıyq» saıabaǵy jáne eski ortalyqtaǵy alańdarda tańerteńgi saǵat 10-nan bastap kópshilikke arnalǵan is-sharalar, buqaralyq serýender bastaldy.

Osy ýaqytta «Dáýlet» sport kesheninde asyq atýdan «Altyn saqa» saıysynyń týrnıri bastaldy. Bıyl Astanada bul sport oıynynan jarystar úshinshi márte ótkizilip otyr. Byltyr týrnırge 500-den astam adam qatysqan bolatyn. Saıys nátıjeleri boıynsha jeńimpazdarǵa baǵaly syılyqtar tabystalady.

Saǵat 11.00-de qanyń ár jerindegi ashyq alańdarda «Astana samaly» úrlemeli aspaptar orkestrleriniń festıvali bastaldy. Festıvaldiń ashylý saltanaty 4 shilde kúni Kongress-holl saraıynda ótken bolatyn. Qazaqstandyq orkestrler men tanymal sahna sheberleriniń oryndaýyndaǵy klassıkalyq áýen men zamanaýı shyǵarmalar birtýmalary qalǵan kúnderi ashyq aspan astynda ákimdik ǵımaraty aldyndaǵy alańda, «Jastar» saraıy mańyndaǵy kontsert sahnasynda, «Báıterek» monýmenti mańyndaǵy alańda, qalalyq alańda ótetin bolady. «Astana Samaly» kóptegen eldiń ókilderin bir sahnaǵa jınaıtyn qaıtalanbas sazdy dýman. Keremet tehnıka men aıryqsha oryndaýshylyq sheberlik Astana turǵyndary men qonaqtaryna erekshe merekelik aýan syılaıtyn bolady. Úrlemeli orkestrlerdiń sherýi bizdiń qalanyń mádenı ómirindegi jańa qubylys jáne onyń repertýary ár jas ereksheligine arnalyp alýan etip tańdalyp alyndy.

Al túski saǵat 12.00-de Astananyń eski ortalyq alańynda «Aspazshylardyń sheberligi - súıikti qalaǵa» atty festıvaliniń aıasynda uzyndyǵy 150 metrlik «Kımpab» rollyn daıyndaý boıynsha álemdik Gınnes rekordy jańartylatyn bolady. Rekordty ornatý úshin Beıbitshilik kóshesiniń boıyna uzyndyǵy 160 metr bolatyn ústelder ornatylyp, onda koreılerdiń súıikti taǵamy «Kımpab» atty sýshılary ázirlenip, qoıylady. Osy ýaqytta «Koreı barabandarynyń shoýy» ujymynyń kontserttik baǵdarlamasy bastalady.

Jańa álemdik rekordty qýattaý úshin Astanaǵa Gınnes rekordtary kitabynyń ókilderi arnaıy kelgen. Rekord qýattalǵannan keıin shef- aspazdyń komandasy rolldy teńdeı bólikterge bólip, astana turǵyndary men qala qonaqtaryna dámaýyz tıgizetin bolady.Qala turǵyndary men qonaqtary ortalyq alańda ózge halyqtardyń taǵamdarynan da dám tata alady.

«Han Shatyr» mańynda boı kótergen kóshpeliler aýyly festıvali, «Azııa jańǵyryǵy» tsırk óneriniń halyqaralyq festıvali, túrki mýzykasynyń «Astana-Arqaý» halyqaralyq festıvali búgin de jalǵasyn tabýda.

5 shilde kúni ótetin premeralardyń biri Lara Fabıan men Igor Krýtoı usynatyn «Mademýazel Jıvago» shoý-kontserti bolmaq. Jandy daýysty ónerdi súıetin qaýym bul kontsertti «Qazaqstan» Ortalyq kontsert zalynda saǵat 18.00-de tamashalaı alady.

Kesh - jalyndy jastardyń ýaqyty. Saǵat 20.00-de Baýyrjan Momyshulynyń saıabaǵynda Qazaqstan, Qyrǵyzstan, Reseı, Belarýs, Ýkraına jáne Ózbekstan elderiniń eń úzdik bıshileriniń jarysy ótedi. Saıystyń urany - «Qozǵalys bar jerde - ómir bar!». Jastardyń ónerin baǵalaıtyn qazylar alqasy shet el mamandarynan quralatyn bolady. Olardyń ishinde "So you think you can dance" amerıkandyq bı shoýynyń jeńimpazy, bıshi, ártis Stephen "tWitch" Boss; Los-Andjelestegi "Millennium" bı kesheniniń múshesi, ártis Cedric Gardner; Germanııada qazirgi zamanǵy bı óneriniń negizin qalaýshy Nick Whage; tanymal bıshi, hıp-hop bıiniń burynǵy mektebiniń ókili Super Dave bar.

Saıysqa «kóshe» bılerin oryndaıtyn Qazaqstan men shet eldiń 30 ujymy qatyspaq.

«Áýen - aǵys» klassıkalyq mýzyka festıvaliniń sheńberinde Esil ózeniniń ústine ornatylǵan qalqymaly sahnada búgin N.Úsenbaeva, J.Baspaqova, S.Baısultanov, G.Dáýirbaeva, T.Musabaev, S.Rahmetova sondaı-aq, Abaı atyndaǵy Memlekettik akademıalyq opera jáne balet teatrynyń balet trýppasy jáne Sımfonııalyq orkestr óner kórsetedi.

Astana qalasynyń týǵan kúni qurmetine shara sońynda ádettegideı otshashý bolady.