Astanada qala ákimi Imanǵalı Tasmaǵambetov bastaǵan jalpyqalalyq senbilik ótti
STANA. Sáýirdii 24-i. QazAqparat /Gúlmıra Álıakparova/ - Senbilikter bıýdjetke salmaq túsirmeý úshin ne bolmasa, kommýnaldyq qyzmetterdiń mindetterin turǵyndardyń ıyǵyna artý úshin jasalyp jatqan joq. Bul týraly búgin Astana ótken jalpyqalalyq senbilik barysynda jýrnalısterge bergen suhbatynda qala ákimi Imanǵalı Tasmaǵambetov aıtty.
I.Tasmaǵambetovtyń aıtýynsha, senbilikter óz mańyzdylyǵyn eshqashan joǵaltpaıdy. Sebebi eýropalyq standarttar boıynsha senbilikterden arylý úshin, qazaqstandyqtardyń mádenıeti soǵan sáıkes bolýy tıis. Ákim, senbilikterge artta qalǵan úrdis retinde qaraý úshin, qala turǵyndary qoqysty kez-kelgen jerge laqtyrmaı, oǵan óz úıindeı qarap, ara-tura bolsa da, tazalyq jumystaryn jasap turý qajettigin atap kórsetti.
«Qalanyń jalpy tabysy 70 mıllıard teńgeni quraıdy. Ashyp aıtqanda, bul soma aǵymdaǵy shyǵystar men qalany abattandyrýǵa baılanysty mindettemelerdi qamtamasyz etýge jetpeıdi. Sondyqtan, biz abattandyrýǵa baılanysty barlyq shyǵystardy tolyq kólemde qarjylandyryp otyrmyz dep aıta almaımyz. Biraq, senbilikter bıýdjetke salmaq túsirmeý úshin ne bolmasa, kommýnaldyq qyzmetterdiń mindetterin turǵyndardyń ıyǵyna artý úshin jasalyp jatyr deýge bolmaıdy. Jalpy, Astana eldiń tek ákimshilik-saıası ortalyǵy ǵana emes, Astana bul - jas, qarqyndy damyp kele jatqan zamanaýı qala. Ol ózgelerge úlgi bolýy tıis. Sondyqtan, senbilikter qandaı da bir materıaldyq tabys kórý maqsatynda uıymdastyrylyp jatqan joq. Munda eń aldymen úlken tárbıelik mán jatyr», - dedi I.Tasmaǵambetov.
«Biz - qala tazalyǵy úshin!» uranymen ótip jatqan senbilikke 75 myńǵa jýyq elordalyq shyqty. Senbilik barysynda 2 myńnan astam aǵash pen 2,5 myń kóshet otyrǵyzý kózdelýde.
Qala basshysynyń sózine qaraǵanda, senbilik barysynda 120 qoqys alańdary tazalanyp, 1,5 myń tonna qoqys qala syrtyndaǵy polıgonǵa shyǵarylatyn bolady.
