Astanada kadr izdegen jumys berýshiler kóbinde 240 myń teńge aılyq usynady

ASTANA. QazAqparat - Elordalyq eńbek naryǵy - Qazaqstandaǵy eń damyǵan naryqtyń biri sanalady. Osy jyldyń birinshi jartyjyldyǵynda elordada 40 myńnan astam bos jumys orny ashylǵan, dep habarlaıdy QazAqparat HeadHunter sholýyna silteme jasap.

Ótken jyly Astana eńbek naryǵyndaǵy vakansııa sany 23% artty, túıindemeniń ósimi - 13%.

Bir bos orynǵa orta eseppen úsh-tórt adam úmitker.

Jumys berýshiler hh.kz saıtynda jumys izdegenderge orta eseppen 240 myń teńge (Qazaqstan boıynsha eń joǵary kórsetkish) usynǵan. Al izdenýshiler kútken eńbekaqy - 290 myń teńge.

Ótken jyly qyzmetkerlerge eń úlken suranys satý, býhgalterlik esep, qarjy, ákimshilik-basqarý personaly jáne aqparattyq tehnologııalar salasynda baıqalady.

Jumys berýshiler arasynda jas mamandarǵa suranys joǵary. Búkil bos jumys oryndarynyń 16% solarǵa arnalǵan.

Elorda turǵyndary kóbinde satý menedjeri, satýshy-keńesshi, ákimshi jáne býhgalter retinde jumys izdeıdi.