Astanada Qabanbaı batyr dańǵylynyń bir bóligi ýaqytsha jabylady
ASTANA. KAZINFORM — Qalqaman kóshesinen Saraıshyq kóshesine deıingi Qabanbaı batyr dańǵylynyń ýchaskesinde jóndeý jumystarynyń júrgizilýine baılanysty aǵymdaǵy jyldyń 7-8 tamyzy aralyǵynda atalǵan ýchaskede kólik qozǵalysy ishinara jabylatyn bolady. Bul týraly Astana qalasynyń ákimdigi málim etti.
Kólik qozǵalysy eki baǵytta da joldyń bir jaǵymen uıymdastyrylady.
— Júrgizýshiler men jaıaý júrginshilerden marshrýttardy aldyn ala josparlaýdy jáne qozǵalysty uıymdastyrýdaǵy yqtımal ózgeristerdi eskerýdi suraımyz. Qaýipsizdikti qamtamasyz etý jáne qolaısyzdyqty azaıtý úshin ýaqytsha jol belgileri men kórsetkishter ornatylatyn bolady. Osy ózgeristerge túsinistikpen qaraýdy jáne qala boıynsha qozǵalystardy josparlaý kezinde olardy aldyn ala eskerýdi suraımyz, — delingen ákimdiktiń habarlamasynda.
Aıta keteıik, buǵan deıin Astanada Abaı dańǵylynda jóndeý jumysyna baılanysty qozǵalys shektelgen edi.
