Astanada Q.Qasymovtyń qatysýymen qyzmettik boryshyn óteý barysynda qaza tapqan ІІM qyzmetkerlerine monýment ashyldy
ASTANA. 21 maýsym. QazAqparat - Búgin elordada Qazaqstan polıtsııasy kúni qarsańynda qyzmettik boryshyn óteý barysynda qaza tapqan ishki ister organdary qyzmetkerleri men ishki áskerler áskerı qyzmetshilerine arnalǵan monýmenttiń ashylý rásimi ótti.
«Elimizdiń táýelsizdik jyldarynda qyzmettik mindetin oryndaý kezinde 703 polıtseı men QR ІІM ishki áskeriniń 21 áskerı qyzmetshisi qaza tapty. Otanymyz quqyq qorǵaýshylardyń boryshtaryn óteýin óte joǵary baǵalady. Atalǵan jyldar ishinde ishki ister organdarynyń 877 qyzmetkeri men ishki áskerdiń áskerı qyzmetshileri elimizdiń memlekettik nagradarymen marapattaldy. Ókinishke oraı, olardyń 90-yna nagradalar qaza tapqannan keıin berildi», - dedi QR Іshki ister mınıstri Qalmuhanbet Qasymov.
Monýmenttiń ashylý saltanaty barysynda mınıstr Іshki ister mınıstrliginiń vedomstvolyq oqý oryndarynyń úzdik túlekterine shender tabys etti.
«Bizdiń oqý oryndarymyzdyń úzdikterine osy monýment aldynda shen tapsyrý jyl saıynǵy dástúrge aınalady», - dep atap ótti mınıstr.
