Astanada K.Baıseıitovanyń týǵanyna 100 tolýyna arnalǵan mereıtoılyq sharalar ótýde
ASTANA. 11 sáýir. QazAqparat - Búgin Astanadaǵy QR Ulttyq muraǵatynda Mádenıet jáne aqparat mınıstrliginiń uıymdastyrýymen halqymyzdyń kúmis kómeı, jez tańdaı ánshisi, Keńes odaǵynyń halyq ártisi Kúlásh Baıseıitovanyń týǵanyna 100 tolýyna arnalǵan qujattyq kórme ashyldy.
Kórmege K.Baıseıitovanyń artynda qalǵan mol murasy, sonyń ishinde Ulttyq muraǵatta saqtalǵan, Almatydaǵy ortalyq muraǵattan jáne ánshiniń jeke muraǵatynan alynǵan dúnıeler qoıyldy.
Sharaǵa ónersúıer qaýym men ánshiniń ónerin qurmetteıtin qazaq jurty kóp jınaldy. Kesh «Qazaqtyń bulbuly» atanǵan áıgili ánshiniń ómirbaıanynan syr shertetin beınefılmniń kórsetiliminen bastaldy.
QR Mádenıet jáne aqparat vıtse-mınıstri Arman Qyryqbaevtyń aıtýynsha, bıyl el boıynsha K.Baıseıitovanyń 100 jyldyǵyna arnalǵan is-sharalar keshenin ótkizý josparlanýda.
«Qazaq kásibı mýzyka óneriniń tarıhynda dál osy Kúlıash apamyzdyń tulǵasyndaı óziniń daýysymen erekshelenip, halyqtyń jadynda óshpesteı bolyp qalǵan tulǵa kemde kem. Másele toılaýda emes, másele - óskeleń urpaqtyń jadynda ánshiniń esimin qaldyrý, osy kisiniń arýaǵyna bas ııý, artynda qalǵan urpaqtary - bizder, óziniń jez tańdaı ánshiligimen, qaıtalanbas ónerimen halqynyń atyn álemge pash etken, qazaq ónerinde bertinge deıin tańsyq bolyp kelgen opera óneriniń bar ekendigin dáleldeı bilgen apamyzdyń sol kezdegi jasaǵan eńbeginiń sál de bolsa, kishkentaı ǵana qaıtarymy bolsyn degen nıette», - deıdi vıtse-mınıstr.
Kúlásh Baıseıitova shyrqaǵan «Gákký», «Madam Batterflıaı» operasyndaǵy Chıo-Chıo-Cannyń monology, «Bulbul», «Abaı» operasyndaǵy Ajardyń áni, «Qyz Jibek» operasyndaǵy Jibek arııasy, «Er Tarǵyn» operasyndaǵy Aqjúnistiń áni, «Birjan-Sara» operalyq aıtysyndaǵy Sara ánderi qazaq dalasynyń ánshilik ónerin álemdik deńgeıge kóterdi.
«Ol qazaq operasynyń negizin qalaǵan biregeı tulǵa. Ol álemge áıgili Stanıslavskıı, Nejdanov, Nemırovıch-Danchenkolarmen birge 1939 jyly KSRO-nyń halyq ártisi ataǵyn aldy. Olardyń artynda tutas Eýropa, Parıj turdy, al Kúláshtiń artynda - qazaq dalasy. Bul halqymyzdyń tabıǵı daýysy edi», - deıdi QR Ulttyq muraǵattyń dırektory Marat Ábsemetov
Kúlásh Baıseıitova qysqa da bolsa jarqyn ómirimen, kúmis kómeı, jez tańdaı ánshiligimen qazaqty kópshilikke tanytty. Óziniń qaıtalanbas darynymen qazaq operasyn az ýaqyt ishinde álemdik deńgeıge kóterdi. Ásem daýsymen eldiń dańqyn, halqynyń mereıin arttyrdy. Ozyq mádenıetimizdi halyqaralyq óner týyndylarymen baıytty. Qazaq qyzdarynyń ishinen shyqqan tuńǵysh opera ánshisi Máskeý sahnalarynda án salyp, Keńes odaǵynda talǵampaz kórermen qoshemetine bólendi. Aqqý ǵumyr, jeztańdaı ánshi ómirden ozsa da, ol somdaǵan jarqyn beıneler syńǵyr únimen súıgen halqynyń júreginde saqtalyp keledi. Ol somdaǵan qazaq arýlarynyń qaıtalanbas beıneleri halyqtyń máńgilik esinde qala bermek.
