Astanada Izraıl jazýshysy jáne aqyny Igor Gýbermannyń shyǵarmashylyq keshi ótedi
ASTANA. 13 qyrkúıek. QazAqparat - 14 qyrkúıekte Astanada Izraıl jazýshysy jáne aqyny Igor Gýbermannyń shyǵarmashylyq keshi ótedi. Bul týraly astana.kz saıtyna Nazarbaev ortalyǵynyń baspasóz qyzmetinen habarlady.
Shyǵarmashylyq kesh barysynda jazýshy shyǵarmalarynan úzindiler oqyp, basynan keshken oqıǵalar týraly áńgimeleıdi. Aqynnyń shyǵarmalarymen jaqsy tanys jandar oǵan ózderiniń saýaldaryn qoıa alady.
Igor Gýberman, Izraıl aqyny, jazýshy 1936 jyly 7 shildede Harkov qalasynda dúnıege kelgen. Máskeý temirjol kóligi ınjenerleri ınstıtýtyn (MTII) támamdap, ınjener-elektrık dıplomyn alǵan. Birneshe jyl boıy mamandyǵy boıynsha jumys isteıdi, biraq ádebıetti tastamaıdy. 1979 jyly Gýberman jalǵan aıyppen sottalyp, 5 jylǵa bas bostandyǵynan aıyryldy. Ol lagerde júrip kúndelik jazady. Aıdaýda bolǵan jyldary osy kúndelikterdiń negizinde «Progýlkı vokrýg baraka» («Barak aınalasyndaǵy serýender») (1988 j. jarııalanǵan) atty kitabyn jazǵan. 1984 jyly aqyn Sibirden oralady, biraq qalada tirkelip, jumysqa tura almaıdy. 1987 jyly Gýberman KSRO-dan qonys aýdaryp, 1988 jyldan beri Ierýsalımde turyp jatyr. Ol aqyndyq keshterge qatysý úshin Reseıge jıi baryp turady.
