Astanada IYU mınıstrleri ǵylym-bilim máselelerin talqylaýda
Elýden astam bilim, ǵylym jáne tehnologııalar salalarynyń mınıstrleri «IYU ǵylym, tehnologııa jáne ınnovatsııa salasyndaǵy 2026 jylǵa deıingi baǵdarlamasyn» talqylaý úshin jınaldy. Atalǵan qujatty 10-11 qyrkúıekte Astanada ótetin Ǵylym jáne tehnologııalar boıynsha Islam Yntymaqtastyq Uıymynyń birinshi sammıtinde memleket basshylary bekitedi.
Jıynnyń ashylý saltanatynda sóz sóılegen QR Bilim jáne ǵylym mınıstri Erlan Saǵadıev IYU ǵylym jáne tehnologııalar boıynsha tuńǵysh sammıtiniń QR Prezıdenti Nursultan Nazarbaevtyń bastamasymen uıymdastyrylyp otyrǵanyn eske saldy. Bul týraly Elbasy 2016 jyly Ystanbulda ótken IYU 13-shi sammıtinde málimdegen bolatyn.
«Ǵylym men tehnologııalarǵa arnalǵan alǵashqy sammıt bastamasy IYU-ǵa múshe barlyq memleketterdiń bilim-ǵylym, tehnologııalar jáne ınnovatsııalar salasyndaǵy yntymaqtastyǵyn nyǵaıta túsýine baǵyttalǵan. Bastamaǵa barlyq memleket basshylary qoldaý bildirdi jáne búgin Astanada IYU-ǵa múshe memleketterdiń 50-den astam ókilderi jınalyp otyr. Sammıtte bekitiletin baǵdarlama joǵary tehnologııaly jobalarǵa jol ashyp, ǵylym-bilim salasynda jetistikterge jetýge múmkindik beredi», - dedi ol. 
Sammıt IYU múshe memleketteriniń ǵylymı-tehnıkalyq áleýetin damytý salasyndaǵy seriktestikti nyǵaıtý máselelerin talqylaýǵa arnalǵan dıalog alańyna aınalmaq. Qazirgi ýaqytta Qazaqstan Respýblıkasynyń ǵylymı uıymdary men joǵarǵy oqý oryndary IYU múshe memlekettermen belsendi yntymaqtastyq ornatyp keledi. Malaızııa, Oman, Birikken Arab Ámirlikteri, Iordanııa, Qyrǵyzstan, Ázerbaıjan, Túrkııa jáne ózge de eldermen yntymaqtastyq týraly kelisim ornatylǵan. 
Islam yntymaqtastyǵy uıymy - 1969-shy jyly qurylǵan, eń iri jáne eń yqpaldy resmı úkimetaralyq musylmandyq halyqaralyq uıym bolyp tabylady. Qazirgi tańda jalpy sany 1,5 mlrd turǵyndary bar 57 eldi biriktiredi. IYU-nyń negizgi qaǵıdasy: tutas teńdik; ár halyqtyń ózin-ózi bıleý quqyǵyn syılaý; ishki isterge kirispeý; egemendikti, memleket aýmaǵynyń egemendigi men táýelsizdigin syılaý;IYU memleket-músheleriniń arasynda paıda bolǵan daýly máselelerdi beıbit túrde kelissóz arqyly, deldaldylyq jáne arbıtraj arqyly sheshý; memleket-múshelerdiń aýmaqtyq bútindigine, sonymen birge saıası táýelsizdikke qarsy keletin qaýipti jáne kúshti qabyldamaý
Qazaqstan 1995-shi jyly Uıymnyń tolyq quqyqty múshesi boldy.
