Astanada IV halyqaralyq energııa únemdeý forýmy ótip jatyr
ASTANA. QazAqparat – Elordada energııa únemdeý máselelerine arnalǵan halyqaralyq forým jumysyn bastady, dep habarlaıdy QazAqparat tilshisi.
«Energııa únemdeý kúnine oraı uıymdastyrylǵan tórtinshi halyqaralyq forýmǵa qosh keldińizder. Energııa únemdeý jáne onyń tıimdiligin arttyrý máselesi kún tártibinde tur. Sońǵy 5 jylda álem boıynsha energııanyń ortasha syıymdylyǵy 1,3%-ǵa tómendegen. Bul kórsetkish 2011-2016 jyldarmen salystyrǵanda 2 ese az (2,3%). Qazaqstan - energııany kóp qajet etetin elderdiń biri. Energııa únemdeý saıasatyn belsendi júrgizýdiń arqasynda jalpy ishki ónimniń energııa syıymdylyǵyn 2008 jylǵy deńgeıden 38%-ǵa tómendetýge qol jetti», - dedi QR Indýstrııa jáne ınfraqurylymdyq damý vıtse-mınıstri Marat Qarabaev forýmnyń ashylý saltanatynda.
Onyń aıtýynsha, bıýdjet sektorynda energııa únemdeý úshin eýropalyq standartqa saı ǵımarattar, tehnologııalar, jabdyqtar salasynda birqatar talaptar engizildi.
«Elimizde 2012 jyldan bastap energııa aýdıti ótkizilip keledi. Onyń nátıjesinde 323 mlrd teńge somasyna energııa tıimdiligi jónindegi is-sharalar iske asty. Bul bizge jylyna 82 mlrd teńge únemdeýge kómektesti. Sonymen qatar bıyl energııany tıimdi paıdalanýdy ilgeriletý maqsatynda «Energııa únemdeý týraly» zańǵa ózgerister men tolyqtyrýlar engizildi. Sol arqyly Gollandııa tájirıbesine súıene otyryp memlekettik satyp alýdyń jańa tetigin engizdik. Biz memlekettik energetıkalyq tizilim sýbektisiniń uǵymyn keńeıttik, oǵan sáıkes bıýdjettik sektor uıymdaryn tolyq qamtý jáne olardyń energııa tutyný monıtorıngi qamtamasyz etiledi», - deıdi ol.
Aıta ketsek, atalǵan forýmǵa memlekettik quzyrly organdar ókilderi, otandyq jáne sheteldik energııa óndiretin uıymdary men sala mamandary qatysyp jatyr.
