Astanada ІV dástúrli «Altyn tulpar» respýblıkalyq bəıgesi ótedi
ASTANA. QazAqparat - Tanymal ulttyq sport túri boıynsha týrnır halyqaralyq mamandandyrylǵan EKSPO-2017 kórmesi aıasynda ótedi, habarlaıdy elorda ákimdiginiń medıa ortalyǵy.
Búgin Astana ákimdigi men ulttyq sport túrleri boıynsha respýblıkalyq federatsııa «Samuryq-Qazyna» ulttyq ál-aýqat qorynyń, QR Mádenıet jáne sport mınıstrliginiń, «Nur Otan» partııasynyń, sonymen qatar «EKSPO-2017» UK qoldaýymen elordada «Altyn tulpar» alaman báıgesin ótkizedi.
Jarys osymen tórtinshi ret uıymdastyrylyp otyr. Bıyl alaman-báıge formaty birqatar ózgergen bolatyn. Eger buǵan deıin júgirip ótý sheńberi 12,5 shaqyrymdy qurasa, endi 7 shaqyrym. Qashyqtyq - 51 km.
Qashyqtyqta ár 2 shaqyrym saıyn baqylaý pýnktteri ornalasady, onda tóreshiler, veterınarlar, quqyq qorǵaý organdarynyń ókilderi bolady. Báıgeniń ótý barysy beınebaqylaý kameralaryna túsiriledi.
At jarys tikeleı efırde jáne LED-ekranda kórsetiledi. Báıgege Qazaqstannyń barlyq oblystarynan jáne Almaty men Astana qalalarynyń komandalary qatysady.
Bas júldege 10 mln teńge tigilgen. Sondaı-aq júldelerdi birinshi kelgen 9 shabandoz ıelenedi.
Báıge Aqmola oblysy, Tselınograd aýdany, «Qabanbaı batyr» aýylynda ótedi (Astanadan 35 shaqyrym jerde).
Alaman báıge 3-qyrkúıek kúni 11:00-de bastalady.
