Astanada ITS júıesine 31 baǵdarsham qosylady
ASTANA. QazAqparat - Astanada zııatkerlik kólik júıesimen (ITS) búgingi tańda 443 baǵdarshamnyń 105 nysany qamtylǵan, dep habarlaıdy elorda ákimdiginiń resmı saıty.
Kólik jáne jol-kólik ınfraqurylymyn damytý basqarmasynan belgili bolǵandaı, 2019 jyldyń sońyna deıin ITS júıesine 31 baǵdarsham qosylady. Sondaı-aq 48 aqparattandyrý tablosy, 130 radıolokatsııalyq detektor ornatylady.
«Budan bólek, toǵyz jol qıylysynda 87 beınedetektor, 27 beınebaqylaý kamerasy ornatylady. Bul jalpy kólik aǵynyna áser etetin negizgi kólik toraptaryn qamtýǵa, qoldanystaǵy kóshe-jol jelisiniń júktemesin birkelki bólýge jáne onyń ótkizý qabiletin arttyrýǵa múmkindik beredi», - delingen vedomstvonyń habarlamasynda.
