Astanada ıtke tumyldyryq kıgizbegeni úshin ıesine aıyppul salynbaıdy
ASTANA. QazAqparat - Jańa erejege saı Astanada janýarlardy qysqa qarǵybaýda jáne tumyldyryqta arnaıy oryndarda serýendetý ruqsat etilgen, dep habarlaıdy elorda ákimdiginiń medıa ortalyǵy.
Alaıda qalada áli úı janýarlaryn serýendetýge arnalǵan arnaıy oryn qarastyrylmaǵandyqtan janýardyń ıesine aıyppul salynbaıdy, oǵan eskertý berýmen shekteledi.
Esterińizge salamyz, Astanada ıtter men mysyqtardy serýendetýdiń jańa erejesi quryldy. Janýarlarmen aýlalar men balalar alańqaılarynda qydyrýǵa ruqsat etilmeıdi.
«Erejede ıt qysqa shylbyrda jáne tumyldyryqta serýendetýge arnalǵan orynda júrý kerektigi aıtylǵan. Astanada ázirge ondaı birde-bir oryn joq. Kez kelgen polıtseı eger ıtpen tumyldyryq taqpaı júrse nemese uzyn qarǵybaý taǵyp qoısa, toqtatyp, ákimshilik quqyqbuzýshylyqty buzǵany týraly qujat rásimdeýge quqyly. Biraq ıt árdaıym tumyldyryqta júre almaıdy, ol erkin serýendeý úshin bosatý kerek. Alaıda bizde ondaı oryndar joq»,- dedi elorda ákimdiginiń medıa ortalyq tilshisine Qazaqstan kınologtar odaǵynyń tóraǵasy Aleksandr Belonenko.
Budan bólek, A.Belonenko óz janýarynyń sońynan qaldyqtardy jınap júrý qajettiligin jáne ekpe tólqujaty bolýy kerektigin aıtady. Eger janýary qorshaǵan ortany lastaǵan jaǵdaıda ıesi qaǵaz nemese polıetılen paketke jınaýy tıis. Olaı etpegen jaǵdaıda ákimshilik aıyppul salynýy múmkin nemese eskertý alady.
It-mysyqtardy toǵandarda, fontandar men sý jınalatyn oryndarda shomyldyrýǵa bolmaıdy.
It ıesi dalaǵa shyǵarar aldynda ıesiniń baılanys málimetteri jazylǵan shylbyr taǵýy kerek. Eger úı janýary joǵalǵan nemese qańǵybas ıtterge arnalǵan orynǵa túsken jaǵdaıda ıesin qarǵybaýyna qarap ońaı taýyp alýǵa bolady.
Sonymen qatar, úı janýarynyń densaýlyǵy týraly veterınarlyq tólqujaty bolady jáne turaqty ekpe alyp turýy tıis. Veterınarlardyń usynysy boıynsha, jylyna bir ret qutyrma jáne úsh aı saıyn parazıtterge qarsy ekpe jasalýy kerek.
