Astanada ıtalııalyq dızaınerler sheberlik sabaqtaryn ótkizedi
ASTANA. QazAqparat - Elordada sán álemindegi basty oqıǵalardyń biri - Kazakhstan Fashion Week Astana aptalyǵy bastaldy, dep habarlaıdy QazAqparat tilshisi.
Bıyl KFW Astana tarıhynda tuńǵysh ret tanymal ıtalııalyq dızaınerler óz toptamalaryn tanystyryp, qatysýshylarǵa biregeı sheberlik sabaqtaryn ótkizbek.
«Búgin KFW Astana sán aptalyǵynyń 7 maýsymy ashylyp otyr. Bıyl da jańa toptamalarmen, jańa obrazdarmen, jańa dızaınerlermen tań qaldyramyz dep úmittenemiz. Aıta keterligi, bıyl Eýropalyq dızaın ınstıtýtymen (Istituto Europeo di Design) kelisimshart ornattyq. Osyǵan oraı, Vogue Italy jýrnalynyń redaktory, stılıst Rıkardo Tertso, Eýropalyq dızaın ınstıtýtynyń kreatıv-dırektory Djovannı Ottonello, dızaınerler - Salvatora Vıgnola men Federıko Baratstso Astanaǵa arnaıy keldi», - dep atap ótti Kazakhstan Fashion Week jobasynyń bas proıýseri Irına Baıjanova KFW Astana aptalyǵyna arnalǵan baspasóz máslıhatynda.
Uıymdastyrýshylardyń aıtýynsha, ıtalııalyq mamandar qazaqstandyq dızaınerlerge jáne aptalyq qatysýshylaryna «Sán jáne bıznes», «Jańa trendter» taqyrybynda sheberlik sabaqtaryn ótkizedi. Al Eýropalyq dızaın ınstıtýtynyń (Istituto Europeo di Design) kreatıv-dırektory Djovannı Ottonello qazaqstandyq dızaınerlerdiń jumystaryn baǵalap, qundy keńesterimen bólispek.
Aıta keteıik, 21-23 qarasha kúnderi elordada Kazakhstan Fashion Week Astana aptalyǵy ótedi. Onda Mıhaıl Kravets, Aıda Qaýmenova, syndy qazaqstandyq dızaınerler jáne otandyq One to One, Kurak Korpe, Soul's station, Samidel, Eliz, Mandarin Narbayeva brendteri óz toptamalaryn kórsetedi.
Odan bólek, sán aptalyǵynda arnaıy shaqyrylǵan sheteldik dızaınerler - Salvatora Vıgnola, Federıko Baratstso, Mınavara jáne Tıko Nebıerıdzeniń kórsetilimderi ótedi.
Sondaı-aq, ıtalııalyq dızaıner, IED Roma túlegi Federıko Baratstso KFW Astana keshinde óziniń «SS18» atty jańa toptamasyn tanystyrady.
