Astanada ıslam qarjy qyzmetterin engizý máseleleri talqylandy
ASTANA. QazAqparat - «Astana» halyqaralyq qarjy ortalyǵy (AHQO) Islamic Financial Services Board (IFSB) birlese otyryp, ıslam qarjy qyzmetteri keńesiniń standarttaryn engizý boıynsha semınar ótkizdi. Bul týraly QazAqparat Ortalyqtyń baspasóz qyzmetine silteme jasap habarlaıdy.
Azııa Damý bankiniń qoldaýymen ótip jatqan semınarǵa TMD elderiniń ortalyq bankteri men qarjy naryǵy ókilderi qatysty.
Semınar ıslamdyq bank qyzmetin retteýdiń basty qaǵıdalary, onyń ishinde ıslamdyq «terezeler», táýekel-menedjment, kapıtal jetkiliktiligi jáne ıslamdyq qarjylandyrý qaǵıdattaryna sáıkes basqarý júıeleri bóliginde IFSB standarttaryn egjeı-tegjeıli jáne praktıkalyq zerdeleýge baǵyttalǵan.
Islamdyq qarjylandyrý departamentiniń dırektory Álibek Nurbekov ıslamdyq qarjy AHQO qyzmetiniń basym baǵyttarynyń biri ekendigin atap aıtty.
«Semınar ıslamdyq qarjylandyrý salasyndaǵy kásibı damýǵa baǵyttalǵan AHQO-nyń kóp bastamalarynyń biri. Osyndaı is-sharalardyń ótkizilýi óńirdegi qarjy qyzmetteriniń ıslam ındýstrııasyndaǵy adamı kapıtaldy damytýǵa yqpal etedi jáne tutastaı alǵanda AHQO-ny ıslamdyq qarjylandyrýdyń óńirlik haby retinde qalyptastyrýǵa járdemdesedi», - dedi Á. Nurbekov.
Semınar jumysyna AHQO ókilderi, TMD elderiniń ortalyq bankteriniń ókilderi, Qazaqstan Respýblıkasy mınıstrlikteriniń ókilderi jáne de TMD qarjy ınstıtýttary men qazaqstandyq qarjy naryǵynyń ókilderi qatysty.
IFSB - ıslamdyq qarjy ınstıtýttaryn tıimdi baqylaý jáne retteýge arnalǵan standarttardy ázirleıtin halyqaralyq organ. IFSB óz quzyreti sheńberinde ıslam qarjy salasyna arnalǵan prýdentsııalyq standarttardy ázirleıdi, sondaı-aq ıslamdyq qarjylandyrýdyń (bankıng, saqtandyrý, kapıtal naryǵy) qadaǵalaý jáne retteý standarttaryn jarııalaıdy. AHQO IFSB-ge 2017 jyly kirdi.
