Astanada ishki ister organdarynyń qyzmetkerleri arasynda «Parasatty polıtseı» atty respýblıkalyq semınar konkýrs bastaldy

Atalmysh sharaǵa elimizdiń ár aımaǵynan kelgen 160 tártip saqshysynan quralǵan 18 komanda baq synasýda. Konkýrs erejesi boıynsha olar eń aldymen ózderin kópshilikke tanystyrady.

Ekinshi kezeńde baıqaýǵa qatysýshylar polıtsııa qyzmetkeriniń erekshelikterine baılanysty óz oıyn yqsham ári qyzyqty etip sahnalyq kórinistermen beıneleıdi. Onda jańa tehnologııalardy keńinen paıdalanýǵa bolady. Al úshinshi kezeńde ár komandadaǵy tártip saqshysy qoǵamda týyndaýy múmkin kez kelgen jaǵdaıda qalaı áreket etetinin kásibı sheberligi men biliktiligin paıdalana otyryp, sahnada kórsetýi kerek. Sondaı-aq tórtinshi kezeń «kórkem sóz saıysy» dep atalady. Onda saıysqa túsýshi top músheleri ózderine berilgen orys tilindegi termınderdiń qazaqshasyn taýyp aýdarady jáne sóılem quraıdy. Besinshi kezeńde konkýrs úmitkerleri patrıottyq mazmundaǵy nemese polıtsııa qyzmetine qatysty án oryndaıdy.

Shara barysynda baıqaýdyń maqsat-mindetteri jóninde sóz qozǵaǵan Іshki ister mınıstrliginiń Memlekettik til jáne aqparat departamenti bastyǵynyń orynbasary Qalamqas Temirovanyń aıtýynsha, baıqaý bıyl tuńǵysh ret uıymdastyrylýda. Konkýrs osyǵan deıin elimizdiń aımaqtaryndaǵy departamentterde uıymdastyrylǵan. Sodan iriktelgen úzdik komandalar búgin elordaǵa jınalyp otyr. «Konkýrstyń maqsaty ishki ister organy qyzmetkerleri arasynda memlekettik tildi nasıhattaý. Búgingi Іshki ister mınıstrligindegi is-qaǵazdardyń 94 paıyzy memlekettik tilde júrgiziledi. Búginde respýblıka boıynsha qazaq tilin oqytý kýrstarynda 20 myńǵa tarta qyzmetker oqýda», dedi departament bastyǵynyń orynbasary.