Astanada ishimdik ishken 237 kólik júrgizýshisi ustaldy
NUR-SULTAN. QazAqparat – Astanada úsh aıda 16 myńnan astam jol-kólik erejesin buzý faktisi tirkelgen. Bul týraly Nur-Sultan qalasy polıtsııa departamentiniń baspasóz qyzmeti málimet etti, dep habarlaıdy QazAqparat.
Atap aıtqanda, 237 júrgizýshi ishimdik ishken kúıde kólik quralyn júrgizgen. Olardyń tórteýi jol apatyna ushyrady.
Sondaı-aq, jol-kólik oqıǵasyna 3 qoǵamdyq kólik júrgizýshisi men 14 kámeletke tolmaǵan jasóspirimniń qatysy boldy.
«Jalpy, 3 aıda 113 jol-kólik oqıǵasy tirkeldi. Onyń 93-i júrgizýshilerdiń, 20-sy jaıaý júrginshilerdiń kinásinen. 2 adam qaza tapty, 121 adam jaraqat aldy», - delingen baspasóz qyzmetiniń aqparatynda.
Jol júrý erejesin 1,8 myńnan astam jaıaý júrginshi buzǵan. Kommýnaldyq turaqqa 697 kólik quraly ornalastyryldy.
Elordada kóshe-jol jelisiniń jalpy uzyndyǵy 1,2 myń shaqyrymnan asady. Sondaı-aq, qalada «Sergek» apparattyq-baǵdarlamalyq kesheniniń 700 beketi jumys isteıdi, onyń ishinde 6000 kamera jáne 12 «Integra-KDD» zııatkerlik qıylysyndaǵy 119 kamera bar.
«Kún saıyn marshrýttarǵa tekserý júrgiziledi, kóshe-jol jelisiniń kemshilikteri anyqtalady. Anyqtalǵan faktiler boıynsha fototirkeý júrgiziledi jáne kemshilikterdi joıý úshin aqparat tıisti uıymdarǵa, qalanyń aýdandyq ákimdikterine, sondaı-aq den qoıý sharalaryn qabyldaý úshin «iKomek 109» qyzmetiniń telefonyna jiberiledi», - dep habarlaıdy baspasóz qyzmeti.
Qaýipsizdikti qamtamasyz etý, sondaı-aq adam kóp jınalatyn jerlerde bolatyn qylmystar men quqyq buzýshylyqtarǵa der kezinde áreket etý maqsatynda patrýldik jasaqtar sany arttyrylyp, túrli demalys jáne qoǵamdyq tamaqtaný oryndaryna jaqyn mańaılarda patrýldik qozǵalys baǵyttary úılestirilgen.
Buǵan deıin habarlaǵanymyzdaı, elorda baǵdarshamdaryna «bárine ortaq qyzyl tús» engizilip jatyr.
