Astanada iri halyqaralyq baıqaýlar syılyǵynyń ıegerleri óner kórsetedi
ASTANA. QazAqparat - «Astana Piano Passion» ekinshi halyqaralyq klassıkalyq mýzyka festıvali jáne jas pıanıster baıqaýyndaǵy birinshi óner básekesiniń laýreattary astanalyq kórermenderdi ózderiniń ónerlerimen taǵy da qýantady.
Bul týraly «Astana Opera» teatrynyń baspasóz qyzmetinen habarlady.
Atap aıtqanda, «Astana Piano Passion" ekinshi halyqaralyq klassıkalyq mýzyka festıvali aıasynda álemge attary aıan bolǵan jas daryndy mýzykanttardyń kontserti ótedi. 11 mamyrda saǵat 19.30-da «Astana-Opera» opera jáne balet teatrynyń kameralyq zaly sahnasynda óner kórsetin laýreattar:
Shýan Ern Lı, fortepıano (Avstralııa, 10 jasta) - Birinshi syılyqtyń laýreaty,
Varvara Kýtýzova, fortepıano (Reseı, 10 jasta) - Birinshi syılyqtyń laýreaty,
Ilıa Bahtın, fortepıano (Reseı, 17 jasta) Ekinshi syılyqtyń laýreaty,
Aleksandr Kýtýzov, fortepıano (Reseı, 17 jasta) - Gran-prı ıegeri,
Rýslan Turyntaev, skrıpka (Qazaqstan, 15 jasta), arnaıy qonaq.
Barlyq balalar iri halyqaralyq baıqaýlar syılyǵynyń ıegerleri. Astanadaǵy jeńisterinen soń, olardyń óner kórsetý kesteleri burynǵydan da tyǵyzdana tústi, jas shamalaryna qaramastan, olardyń árqaısysy álemniń túrli elderinde birneshe márte jeke kontsertterin berdi. Astanadaǵy kontsert aıasynda jas pıanıster E. Grıg, R.Vagner, F.Lıst, R. Shýman, S. Rahmanınov jáne basqa da kompozıtorlardyń belgili shyǵarmalaryn oınaýdy josparlap otyr.
Budan basqa, «Astana Piano Passion" ekinshi halyqaralyq klassıkalyq mýzyka festıvali jáne jas pıanıster baıqaýy kúnderinde Reseıdiń halyq ártisi Denıs Matsýevtiń jáne onyń baıqaý laýreattarymen birge kontserti, sondaı-aq RF Prezıdenti syılyǵynyń laýreaty Ekaterına Mechetınanyń jeke kontserti ótedi.
