Astanada ıppoterapııa ortalyǵy ashyldy
Bul keshende halyqaralyq jarystar da ótedi. At sporty-saýyqtyrý kesheni elordada balalar men jasóspirimder sportynyń damýyna da yqpal etedi, dep habarlaıdy Astana ákimdiginiń resmı saıty.
Memleket basshysy 2022 jyldy Balalar jyly dep jarııalady. Prezıdent olardyń ál-aýqaty — memleketimizdiń tabysty bolashaǵynyń senimdi kepili ekenin aıryqsha atap ótti.
Ippodrom — qala turǵyndary úshin biregeı jáne mańyzy zor ortalyq. Tolyq qýatta ıppoterapııa ortalyǵy 2023 jyldyń kókteminen bastap jumys isteıdi.
Balalar, onyń ishinde erekshe balalar ıppoterapııa sabaqtaryna qatysýǵa múmkindik aldy.
Ippodrom balalardyń densaýlyǵyn nyǵaıtyp, psıhoemotsıonaldy jaǵdaıyn jaqsartatyn paıdaly is-sharalarǵa qol jetkizýge múmkindik beredi.
Elordada 7,1 myń múgedek bala bar, olardyń bir myńǵa jýyǵy densaýlyǵy boıynsha jáne dıagnozǵa sáıkes ıppoterapııamen aınalysýy qajet. Balalar úıretilgen jylqylar arqyly at sportymen shuǵyldana alady jáne jarystarǵa, onyń ishinde arnaıy olımpıada aıasynda qatysa alady.
«Astanada «Arǵymaq» at-saýyqtyrý kesheni salyndy. Bul jańa keshenniń negizgi mindeti — erekshe balalarmen ıppoterapııa sabaqtary. Bıylǵy jyl Balalar jyly dep jarııalandy. Bıyl elordamyzdyń balalaryna syı retinde osyndaı ortalyq ashyldy. Keshen halyqaralyq standarttarǵa tolyqtaı sáıkes keledi jáne kelesi jyldan bastap tolyq kúshine enedi. Munda da halyqaralyq jarystar ótedi, balalar men jasóspirimder sport mektepteriniń balalary da qatysady», — dedi At sporty túrlerinen memlekettik jattyqtyrýshy Amanjol Hasenov.
«Men mundaı jaǵdaı múmkindigi shekteýli balalarda paıda bolǵanyna qýanyshtymyn. Ippoterapııa bizge kóp kómektesedi, ana retinde mundaı orynnyń ashylǵanyna óte qýanyshtymyn», - dep erekshe balanyń anasy Aınagúl Qudaıbergenova qýanyshyn jasyrmady.
Ippoterapııa — úıretilgen atpen júrý arqyly ońaltý ádisi. Ippoterapııanyń biregeıligi balalardyń psıhıkasyna áser etýdiń denege arnalǵan ádisteriniń úılesiminde jatyr. Emdik maqsatta atpen júrý balanyń denesine bıohımııalyq áser etedi, ony nyǵaıtady. Ol shabandozǵa balanyń júrý qımylyna uqsas motor ımpýlstaryn beredi.
Jańa at sporty kesheniniń alańynda respýblıkalyq jáne halyqaralyq deńgeıdegi túrli týrnırler men is-sharalar ótkiziletinin atap ótemiz. Sonymen qatar, ortalyq elordada balalar men jasóspirimder sportynyń damýyna yqpal etetin bolady.
