Astanada ınvestıtsııa tartý jumystary júıeli júrgizilip jatyr
ASTANA. KAZINFORM – Memleket basshysy Qasym-Jomart Toqaev «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Qazaqstan halqyna Joldaýynda ınvestıtsııa tartý máselesine erekshe toqtaldy. Bul rette, Astana qalasynda kapıtal aǵyny úshin qolaıly ınvestıtsııalyq ahýal qurý boıynsha josparly jumys júrgizilip jatqanyn atap ótken jón.
Elimiz boıynsha statıstıkaǵa kóz júgirtsek, elorda negizgi kapıtalǵa salynǵan ınvestıtsııalar kólemi boıynsha taý-ken óndirmeıtin óńirler arasynda jyl saıyn kóshbasshy orynda tur.
Ásirese, sheteldik ınvestorlarmen áriptestikti damyta túsip, yntymaqtasý – basty nazarda. Sheteldik ınvestıtsııalardyń negizgi kózderi Nıderland, Belgııa, AQSh, Shveıtsarııa, Reseı, Ońtústik Koreıa jáne ózge de memleketter el ekonomıkasyna qarjy quıýǵa nıetti.
Osy rette, elordada «bir tereze» qaǵıdaty boıynsha jumys isteıtin jáne jobalardy súıemeldeýdi júrgizetin «Astanany damytý ortalyǵy» front-ofısi jumys isteıtinin atap ótken jón. Bul mańyzdy sharýaǵa «Astana Invest» mamandary da kómek kórsetedi. Bul – elordanyń arnaıy ekonomıkalyq aımaqtarynyń basqarýshy kompanııasy.
Atalǵan ortalyqtardyń mamandaryna habarlasqanymyzda, olar ınvestorlar óz qyzmetiniń sıpaty men salasyna baılanysty ártúrli nysandarda memlekettik qoldaý ala alatynyn atap ótti. Sondaı nysandardyń biri – ınvestıtsııalyq kelisimshart nemese ınvestıtsııalyq kelisim negizinde beriletin ınvestıtsııalyq preferentsııalar.
«Investıtsııalyq kelisimshart mehanızmi jer ýchaskelerin berý, kedendik bajdar men salyqtardan bosatý jáne sheteldik jumys kúshin tartý múmkindigi sııaqty birqatar jeńildikti qarastyrady. Sondaı-aq aldyńǵy jyldary 25 jylǵa deıingi merzimge jasalatyn jáne Qazaqstan Respýblıkasynyń zańnamasynda kózdelgen barlyq jeńildikti bildiretin ınvestıtsııalar týraly kelisim iske qosylǵan bolatyn. Bul jeńildikterdi alýdyń basty sharty – jobanyń Úkimet bekitken basym qyzmet túrleriniń tizbesine sáıkestigi», - deıdi «Astanany damytý ortalyǵy» front-ofısi basshylyǵy.
Qoldaýdyń taǵy bir túri – «Arnaıy ekonomıkalyq jáne ındýstrııalyq aımaqtar týraly» zańnamaǵa sáıkes beriletin jeńildikter. Olar «Astana – jańa qala» jáne «Astana-Tehnopolıs» arnaıy ekonomıkalyq aımaqtarynyń qatysýshylaryna usynylady. Bul artyqshylyqtar ınvestorlarǵa jer ýchaskelerin, keıbir salyqtar men kedendik bajdardan bosatýdy jáne sheteldik jumys kúshin jumysqa tartýdyń jeńildetilgen tártibin usynady.
«Astana damý ortalyǵy» jáne «Astana Invest» front-ofısteri joǵaryda kórsetilgen qoldaý sharalaryn óteýsiz jáne jan-jaqty kómek kórsetedi. Elorda ekonomıkasyna yqtımal qaıta ınvestıtsııalaý úshin jer ýchaskesin resimdeýden bastap, obektilerdi paıdalanýǵa bergennen keıin jobalarǵa baılanysty barlyq máseleni sheshýge kómektesedi.
Árbir jobaǵa naqty menedjer bekitilip, qadamdyq jol kartasy jasalyp, naqty ýaqyt rejıminde jobalar boıynsha monıtorıng júrgizýge jáne iske asyrý barysyn baqylaýǵa múmkindik beretin «Investıtsııalyq jobalar kartasy» elektrondyq júıesi iske qosyldy.
Sonymen qatar, apta saıyn barlyq memlekettik mekemelerdiń, kommýnaldyq qyzmetterdiń jáne basqa da múddeli tulǵalardyń qatysýymen jumys keńesteri ótkiziledi, onda ınvestordyń árbir máselesi jeke qaralady, pármendi sheshimder qabyldanady, osylaısha, ınvestordyń birde-bir bastamasy nemese problemasy ákimdiktiń nazarynan tys qalmaıdy.
Sondaı-aq ındýstrııalyq parkter jumysynyń oń áserin atap ótken jón. Búgingi tańda №1 Indýstrıaldy parktiń ekonomıkany damytýdaǵy róli orasan. Qazir jalpy aýdany 409 gektar bolatyn 150 jobaǵa arnalǵan osyndaı ekinshi parkti qurý boıynsha jumys júrgizilip jatyr. Basym baǵyttardyń qatarynda mashına jasaý, hımııa, metallýrgııa, tamaq, jeńil ónerkásip, qurylys ındýstrııasy, aǵash óńdeý, farmatsevtıka, qoıma sharýashylyǵy jáne IT tehnologııalar salasy bar.
Eske salsaq, Prezıdent ınvestıtsııalyq ahýaldy jáne bıznes júrgizýge qajetti jaǵdaıdy jaqsartý jolynda úzdiksiz jumys isteý mańyzdylyǵyna toqtaldy.
«Dúnıe júzinde ınvestıtsııaǵa talas órship turǵan kezde elge qarjy tartý úshin «dál osy jerde jáne dál qazir» qaǵıdasy boıynsha sheshim qabyldaý – eń qajet shara. Sondyqtan Úkimet janyndaǵy Investıtsııa shtabyna aýqymdy quzyret berildi. Bul qadam metaldy tereń óńdeý, munaı-gaz-kómir hımııasy, týrızm, energetıka jáne mashına jasaý sııaqty mańyzdy salalardaǵy jobalardy júzege asyrý qarqynyn arttyrýǵa jol ashty. Ekonomıkaǵa salynǵan tikeleı ınvestıtsııa kólemin azaıtyp almaý úshin osy baǵyttaǵy jumysty kúsheıtý kerek. Keıbir ákimder men mınıstrler ınvestor tartý isine jóndi atsalyspaı otyrǵanyn atap ótkim keledi. Úkimet bul sharýany retke keltirýge tıis», - dedi Prezıdent.