Astanada ınvataksıdiń sany artty

ASTANA. KAZINFORM – Bıyl ınvataksı sany 30 birlikke artty. Máselen, byltyr 117 kólik bolsa, qazir 145 kólik bar. Bul týraly Astana ákimi Jeńis Qasymbek Instagram paraqshasynda jazdy. 

«Bıyl ınvataksı sany 30-ǵa jýyq artty. Máselen, byltyr 117 kólik bolsa, qazir 145 kólik bar. Invataksıdegi mańyzdy másele — múgedektigi bar jandardy kreslo-arbamen tasymaldaýǵa arnalǵan mamandandyrylǵan mashınalar sanyn arttyrý. Mundaı arnaıy mashınalardyń sany 26-ǵa deıin ósti. Búgin Kólik mınıstri Marat Qarabaevpen osyndaı arnaıy mashınalardyń artyqshylyqtarymen tanystym», — dep jazdy ákim.

Ákimniń sózinshe, sońǵy eki jylda ınvataksı sany 2 esege artqan. Invataksı múgedektigi bar jandarǵa teń múmkindikter beredi. Olardyń áleýmettik ıntegratsııasyna jáne ómir súrý sapasyna, qozǵalý erkindigin jaqsartýǵa áser etedi. Jańa tehnıka kórsetiletin qyzmetterdiń jyldamdyǵyn, úılesimdiligin jáne tıimdiligin arttyrady.

«Sol sııaqty ońaltý ortalyqtarynyń jelisin, qalalyq ortanyń qoljetimdiligin, protezdik-ortopedııalyq kómekti, sanatorıı-kýrorttyq emdeýdi jáne t. b. keńeıtý boıynsha jumys isteımiz», — dep jazdy elorda ákimi.