Astanada ınternet sapasy Tokıodaǵydan joǵary: Baǵdat Mýsın ne deıdi

ASTANA. QazAqparat – Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın «Astana ınternet jyldamdyǵy jaǵynan Tokıony basyp ozady» degen paıymdaýyna qatysty pikir bildirdi, dep habarlaıdy QazAqparat tilshisi.

Meniń oıymsha, jyl sońyna deıin biz baılanys operatorlarymen birlesken jumystyń nátıjesin kóremiz. Biraq, baılanys sapasyna qoldanýshylardan aqy alyp otyrǵan operatorlar jaýapty. Qazaqstandyqtar qazirgiden de joǵary sapaly ınternetke laıyqty. Degenmen, qazir de baılanys sapasy nashar emes. Sheshilýi kerek máseleni birlesip qarastyramyz, - dedi Baǵdat Mýsın Úkimet otyrysynan keıin BAQ ókilderine arnalǵan brıfıngide.

Sondaı-aq, mınıstr «elimizde ınternet sapasy Tokıoǵa qaraǵanda joǵary» degen halyqaralyq agenttikterdiń analıtıkalyq zertteýine túsinikteme bere almaıtynyn aıtty.

Atalǵan reıtıngterdi biz jasamaımyz. Men ózim Tokıoda bolǵan joqpyn. Salystyrmaly túrde de aıta almaımyn. Biraq, eger Qazaqstannyń ortasha turǵyn sany men Tokıonyń ortasha turǵyndaryna salystyratyn bolsaq... Meniń paıymdaýyma emes, halyqaralyq zertteýlerge súıenýimiz kerek, - dedi vedomstvo basshysy.

Eske sala ketsek, bıyl jazda Baǵdat Mýsın «Astana ınternet jyldamdyǵy boıynsha Tokıony basyp ozdy» degen málimdeme jasaǵan edi. Onyń aıtýynsha, ınternet sapasyna shaǵym kóp bolǵanymen, halyqaralyq reıtıngide Astananyń kórsetkishi jaqsara túsken.