Astanada ınternet máselesin jaryq baǵanalary arqyly sheshpek
ASTANA. KAZINFORM — Astanada mobıldi baılanys sapasy men mobıldi ınternettiń qamtý aımaǵyn jaqsartýǵa, sondaı-aq elordanyń telekommýnıkatsııalyq ınfraqurylymyn damytýǵa baǵyttalǵan qos maqsattaǵy tirekterdi ornatý jobasy júzege asyrylyp jatyr, dep habarlaıdy elorda ákimdiginiń resmı saıty.
Búginde qalada kóshe jaryǵyn qamtamasyz etý jáne baılanys jabdyqtaryn ornalastyrý fýnktsııalaryn biriktiretin osyndaı 12 nysan ornatyldy.
Bir qaraǵanda, mundaı qurylǵylardyń kádimgi jaryqtandyrý tirekterinen aıyrmashylyǵy baıqala bermeıdi. Alaıda olardyń ishinde qalanyń telekommýnıkatsııalyq jelisin damytýǵa arnalǵan mobıldi baılanys jabdyqtary ornalastyrylady.
Zamanaýı qala úshin mundaı sheshimniń mańyzy erekshe. Qos maqsattaǵy tirekter baılanys jabdyqtaryn qoldanystaǵy qalalyq ortaǵa tikeleı kiriktirýge jáne keńistikti barynsha tıimdi paıdalanýǵa múmkindik beredi.
Tehnıkalyq elementter qurylymnyń ishine ornalastyrylady. Sonyń arqasynda tirekterdiń syrtqy kelbeti yqsham ári jınaqy bolyp saqtalyp, elordanyń biryńǵaı dızaın-kodyna sáıkes keledi.
Joba Astana qalasy ákimdiginiń Tsıfrlandyrý jáne memlekettik qyzmet basqarmasy men Beeline Qazaqstan mobıldi operatorynyń birlesýimen júzege asyrylyp jatyr.
— Jobanyń negizgi maqsaty — qaladaǵy mobıldi baılanys sapasy men mobıldi ınternettiń qamtý deńgeıin arttyrý. Elorda damyǵan saıyn telekommýnıkatsııalyq ınfraqurylymǵa qoıylatyn talaptar da artyp keledi. Qos maqsattaǵy tirekter qajetti jabdyqtardy jaryqtandyrý ınfraqurylymymen biriktire otyryp, qalalyq ortada tikeleı ornalastyrýǵa jáne keńistikti qosymsha qurylymdarmen shamadan tys júktemeýge múmkindik beredi. Bul — zamanaýı qalanyń erekshelikterin eskere otyryp, tsıfrlyq ınfraqurylymdy damytýǵa múmkindik beretin praktıkalyq sheshim, — dep atap ótti Astana qalasynyń Tsıfrlandyrý jáne memlekettik qyzmet basqarmasynyń basshysy Berik Ahmetov.
Aldaǵy ýaqytta mundaı nysandardyń fýnktsıonalyn keńeıtýge bolady. Tirekter beınebaqylaý kameralary men aýa sapasyn ólsheıtin datchıkterden bastap ıntellektýaldy jaryqtandyrý júıeleri men Smart City tehnologııalarynyń ózge de sheshimderin ornalastyrýǵa arnalǵan ınfraqurylym retinde paıdalanylýy múmkin.
Buǵan deıin qyrkúıektiń sońyna deıin 50 baǵyttaǵy 124 poıyzǵa Starlink ınternet júıesi ornatylatynyn jazǵanbyz.
