Astanada ınternet arqyly kólik «satyp» kelgen alaıaqtar ustaldy
ASTANA. QazAqparat - Elordanyń quqyq qorǵaýshylary ınternetke jalǵan habarlandyrý ornalastyryp, kólikterdi «satyp» kelgen alaıaqtardy ustady, dep habarlaıdy QazAqparat tilshisi.
Astana qalalyq ІІD-niń baspasóz qyzmetinen málim etkendeı, ınternet arqyly alaıaqtyq jasaǵan qaraǵandylyq otbasylyq jup qolǵa tústi. Naqtyraq aıtqanda, olar ınternetke tómen baǵamen kóliktiń satylatyny týraly habarlandyrý ornalastyryp, birkúndik telefon nómirin qaldyryp otyrǵan.
«Óz habarlandyrýlaryna bóten kólikterdiń fotosýretterin jarııalap otyrǵan. Arzan baǵadaǵy kólikke qyzyqqan jábirlenýshilerden eń adymen qaı oblystan ekenin surap, avtokóliktiń múlde basqa oblysta ornalasqanyn aıtady. Jeńildetilgen baǵaǵa keliskennen keıin alaıaqtar aldyn ala tólemdi kıvı-ámııan nemese kartaǵa aýdarýdy talap etken. Osylaısha, satyp alýshy kelgenshe kóliktiń eshkimge satylmaıtynyna sendirgen. Jábirlenýshiler aldyn ala tólemdi aýdarǵannan keıin alaıaqtar habarlandyrýdy joıyp, uıaly telefondaryn sóndirip, sım-kartany laqtyryp jiberedi», - delingen ІІD habarlamasynda.
Qazirgi ýaqytta ustalǵan alaıaqtarǵa qatysty QR QK-niń 190-baby 2-bóligi boıynsha qylmystyq is qozǵalyp otyr. Birneshe epızod boıynsha alaıaqtar 1,5 mln teńgeni qaltalaryna basqan.
Astana qalalyq ІІD taýardy almaı turyp aldyn ala tólem jasamaýǵa, ondaı jaǵdaıda aýdıoqońyraý shalýǵa keńes beredi. Tipti basqa oblystan kólik satyp alý kezinde sol qaladaǵy týystardy nemese dostardy kómekke shaqyryp, taýardy kórip kelýdi ótiný kerektigin eskertedi.
