Astanada ınternet alaıaqtary 150 adamdy aldap soqqan
ASTANA. QazAqparat - Zamanaýı tehnologııalar, ǵalamtor, áleýmettik jelilerdiń damýy aqshany jańa ádister arqyly ıemdený maqsatymen jasalatyn alaıaqtyqtyń ósýine ákeldi. Tek 2018 jyly ǵana elordanyń quqyq qorǵaý organdaryna alaıaqtyq faktileri boıynsha 4263 adam shaǵymdanyp kelgen, sonyń ishinde árbir úshinshisi onlaın catyp alý kezinde aldanyp qalǵan.
Bul týraly Astana qalalyq prokýratýraǵa silteme jasap «QazAqparat» HAA habarlaıdy.
Internette aldaýdyń eń kóp taraǵan túri - kópke tanymal «OLX» jáne «Kolesa» saıttarynda naryqtaǵy baǵadan tómen satylatyn taýarlar týraly habarlandyrýlar. Onda jábirlenýshilerdiń kóbi alaıaqtyń shotyna elektrondyq tóleý quraldary arqyly aqsha aýdaryp, aldanyp qalady.
Alaıaqtyqtyń bul ádisi jıi qoldanylady, sebebi onda qolma-qol qarajatty tulǵany sáıkestendirýdi talap etpesten paıdalanýǵa múmkindik bar. Jábirlenýshilerdi aldap soqqan qylmyskerler ádette olarmen jeke túrde emes, áleýmettik jeliler nemese telefon arqyly baılanysqa shyǵady. Satyp alýlardy talqylaý kezinde qylmyskerler jalǵan qujattar, mekenjaı anyqtamalaryn paıdalanyp otyrady.
Ózara hat jazysý kezinde satyp alýshy baǵa týraly kelisip, aqshany Qiwi-ámııan arqyly aýdarady. Aqsha aýdarylǵan soń, satýshy akkaýntyn óshirip, izin jasyrady.
Ǵalamtorda kóp taraǵan alaıaqtyqtyń taǵy bir túri jeńil jolmen aqsha tabýǵa ýáde beretin akkaýnttar arqyly jasalady. Osylaısha, 2018 jyly «Instagram» áleýmettik jelisinde alaıaqtyqtyń 125 oqıǵasy tirkelgen. Onda qaskúnemder arnaıy paraqshalar ashyp, adamdardy sporttyq jarystarǵa aqsha tigip, kepildendirilgen utysty alýǵa shaqyrdy. Tartymdy habarlamalarǵa qyzyqqan azamattar aqsha utamyz dep, alaıaqtarǵa qarajatyn aýdaryp otyrǵan. Elordada osyndaı jolmen 150-den astam azamat aldandy.
Bul qylmyskerlerdiń senim bildirgen azamattardy aldaýdyń keıbir ádisteri ǵana. Osyǵan baılanysty, Astana qalasynyń prokýratýrasy azamattardy qyraǵy bolyp, ózderiniń bank kartochkalary týraly qupııa málimetterdi taratpaýdy, taýarlardy tek senimdi resmı saıttardan satyp alýdy suraıdy.
