Astanada «InterFood Astana 2011» taǵam ónerkásibi boıynsha halyqaralyq kórme ótip jatyr
ASTANA. 27 cáýir. QazAqparat /Aınur Kenebaeva/ - Astanada «InterFood Astana 2011» taǵam ónerkásibi boıynsha halyqaralyq kórme ótip jatyr. Atalmysh kórme - osymen 13 ret ótkizilip otyrǵan aýqymdy shara. Búgin astanalyq «Kórme» kesheninde halyqaralyq kórmeniń saltanatty ashylý rásimi boldy.
Kórmeniń aýqymdy ekspozıtsııasynda taǵam ónimderiniń, sýsyndardyń, naýbaıhanalyq, kondıterlik ónimderdiń jabdyqtary men kókónis, jemis óńdeýge jáne konserviler óndirisine arnalǵan jabdyqtardyń, jańa tehnologııalyq qurylǵylardyń tanystyrylymy ótip jatyr. Sonymen qatar taǵam ındýstrııasyna qajetti basqa da buıymdar men qyzmetter jurtshylyq nazaryna usynylýda.
Uıymdastyrýshylardyń aıtýynsha, bıylǵy kórmeniń aýdany ótken jylǵymen salystyrǵanda 50%-ǵa ulǵaıǵan. Kórmeniń jalpy aýdany 1200 sharshy metrdi quraıdy.
Kórmege Qazaqstanmen qatar Belarýs, Moldova, Qytaı, Koreıa, Reseı, Ýkraına, Chehııa syndy elderden kelgen 80 astam san alýan kompanııalar qatysyp jatyr.
«Qazirgi tańda iskerlik baılanystardy qalyptastyrýdyń eń tıimdi mehanızmderiniń biri - kórmelik, jármeńkelik sharalardy uıymdastyrý, sondyqtan da elimizde ótip jatqan halyqaralyq taǵam ónerkásibiniń kórmesi taǵam ındýstrııasy salasyndaǵy jańa tehnologııalyq sheshimdermen tanystyryp, tıimdi seriktestik ornatýǵa septigin tıgizbek», - dep sharanyń negizgi maqsatyna toqtaldy QR Aýyl sharýashylyǵy mınıstrliginiń resmı ókili Arman Muqanov kórmeniń ashylý saltanatynda sóılegen sózinde.
Kórme barysynda «Sapa dástúrleri» atty taǵam ónimderi men sýsyndardyń kásibı degýstatsııasyn uıymdastyrý josparlanǵan. Degýstatsııaǵa usynylǵan úlgilerdi Qazaqstan tamaqtandyrý akademııasy mamandarynan quralǵan qazylar alqasy baǵalamaq.
«InterFood Astana 2011» kórmesin óziniń ITE Group Plc (Ulybrıtanııa) ITE China (Qytaı) syndy halyqaralyq seriktesterimen birlese qazaqstandyq «Iteca» kórme kompanııasy uıymdastyryp otyr.
