Astanada ınfraqurylymdyq jobalardy aıaqtaý úshin memlekettik baǵaly qaǵazdar shyǵarylmaq
ASTANA. KAZINFORM — Astanada birqatar ınfraqurylymdyq jobalardy aıaqtaý úshin 6,197 mıllıard teńgege baǵaly qaǵazdar shyǵarylmaq. Bul týraly elordalyq Ekonomıka jáne bıýdjet josparlaý basqarmasynyń basshysy Aıjan Túgelbaeva máslıhat otyrysynda 2026-2028 jyldarǵa arnalǵan qala bıýdjetin túzetý týraly baıandamasynda aıtty.
— Energetıka jáne kommýnaldyq sektorlardy jańǵyrtý boıynsha Ulttyq jobany júzege asyrý aıasynda memlekettik baǵaly qaǵazdardy shyǵarý arqyly 6 mıllıard 197 mıllıon teńge kóleminde qosymsha qarjy tartý josparlanyp otyr. Bul qarjy jalpy quny 12 mıllıard 330,6 mıllıon teńge bolatyn 7 jobany iske asyrýǵa baǵyttalady. Bıýdjettik baǵdarlamanyń ákimshisi — Energetıka basqarmasy. Jobalar 19,6 shaqyrym jylý jáne elektr jelilerin tartýdy kózdeıdi, onyń ishinde 2,9 shaqyrym jylýmen jabdyqtaý jelileri men 16,7 shaqyrym elektrmen jabdyqtaý jelileri bar. Bul jumystar Sh. Kosshyǵululy, Amman, Q. Muhamedhanov, Sh. Aıtmatov kósheleri, sondaı-aq Ellıngton jáne Agrogorodok aýdandaryndaǵy turǵyndarǵa sapaly kommýnaldyq qyzmet kórsetý úshin júrgiziledi, — dedi Aıjan Túgelbaeva qalalyq máslıhat otyrysynda.
Onyń aıtýynsha, ýaqytyly qarjylandyrýdy qamtamasyz etý 2026-2027 jyldary qurylys jumystaryn aıaqtaýǵa múmkindik beredi. Osylaısha, qazirgi jobalardy eskergende memlekettik baǵaly qaǵazdardy shyǵarý boıynsha qarajattyń jalpy kólemi — 28,7 mıllıard teńge.
Sonymen birge, spıker birqatar is-sharaǵa arnalǵan qarajatty qaıta bólý usynylǵanyn jetkizdi.
Qurylys basqarmasyna — 12 «jaıly mektepke» ınjenerlik jeliler qurylysyn aıaqtaýǵa 1 mlrd 662 mln teńge bólý josparlanǵan. Bilim basqarmasyna — Úrker turǵyn alabyndaǵy 300 oryndyq balabaqsha ǵımaratyn satyp alýǵa bastapqy jarna retinde 1 mlrd teńge qarastyrylǵan. Mádenıet basqarmasyna — vedomstvoǵa baǵynyshty memlekettik mekemeler men uıymdardyń negizgi shyǵyndaryna 500 mıllıon teńge bólinedi.
Talqylaý kezinde depýtattar qala bıýdjetindegi usynylǵan túzetýlerdi qoldady.
