Astanada III halyqaralyq balet ártisteriniń konkýrsy ótedi
ASTANA. QazAqparat - Qyrkúıektiń 10 men 17 aralyǵynda Astanada ІІІ halyqaralyq balet ártisteriniń konkýrsy ótedi. Konkýrstyń quryltaıshysy ári uıymdastyrýshysy - sońǵy jyldary Qazaqstannyń horeografııa ónerin damytýǵa zor úles qosyp kele jatqan «Balet pen ulttyq bıdi damytý jáne qoldaý qory» jeke qory.
ІІІ Halyqaralyq balet ártisteri konkýrsynyń bas seriktesi - Ult kóshbasshysy - Qazaqstan Respýblıkasynyń Tuńǵysh Prezıdentiniń Qory.
Shyǵarmashylyq saıystyń negizgi maqsat-mindeti - horeografııa ónerin dáripteý; klassıkalyq balet dástúrin saqtaý jáne damytý; daryndy jas ártisterdi anyqtap, yntalandyrý; Qazaqstannyń mádenı ımıdjin ósirý.
«Konkýrstar qoǵam músheleri men ártisterdiń kóńilin belgili bir óner túrine buryp, nátıjesinde osy saladaǵy mol jetistikterge kýá bolamyz. Bizdiń konkýrs ta osyndaı nátıje ákeletinine senemiz. Sóz joq, konkýrstyń taǵy bir qyry - elimizdiń mádenı ımıdjin asqaqtatý, sebebi, konkýrsqa dúnıe júziniń ártisteri jınalady» - dep esepteıdi, qordyń atqarýshy dırektory jáne konkýrstyń uıymdastyrý komıtetiniń tóraıymy Ásel Qurmanbaeva.
Konkýrsqa 17 men 25 jas aralyǵyndaǵy Qazaqstannyń, Reseıdiń, Orta Azııanyń, Eýropa men Japonııanyń ártisteri qatysady. Buǵan deıingi eki konkýrs Qazaqstan Respýblıkasy Mádenıet mınıstrliginiń qoldaýymen ótti. Birinshi konkýrs 2006 jyly, al, ekinshi konkýrs 2009 jyly ótip, oǵan Bolgarııa, Reseı, Ýkraına, Qytaı, Qyrǵyzstan, Ózbekstan ókilderi qatysty. Bıylǵy konkýrstyń geografııasy birshama keńeıdi.
Konkýrstyń júlde qorynda áıelder men erler arasynda jeke dara gran-prı, birinshi, ekinshi, úshinshi oryn jáne birneshe yntalandyrý júldesi bar: úzdik dýet, «Úkili úmit», zamanaýı horeografııany úzdik oryndaǵany úshin jáne t.b. atalymdar bar.
Konkýrstyń qazylar alqasyna qazirgi balettiń beldi tulǵalary enip otyr. Olardyń arasynda :Majarstan ulttyq baletiniń dırektory, keremet bıshi ári horeograf; Tamas Zolımozı, jetekshi qytaı horeografy, Beıjiń bı akademııasynyń professory, Qytaı ulttyq bı qaýymdastyǵy Balet komıtetiniń atqarýshy vıtse-prezıdenti, Sıao Sýhýa, daryndy horeograf, áıgili baletmeıster Irjı Kılıannyń assıstenti; Stefan Jeromskıı;- ıtalııalyq baletmeıster, jýyrda «Astana Opera» sahnasynda Rolan Petıdiń «Parıj Qudaı Anasynyń sobory» spektaklin qoıǵan Lýıdjı Bonıno, Slovakııa Ulttyq teatrynyń balet dırektory Iozef Dolınskıı, DANCE OPEN» halyqaralyq balet festıvaliniń negizin qalaýshy Vasılıı Medvedev bar. Qazylar alqasynyń jaýapty hatshysy Balet konkýrstarynyń halyqaralyq federatsııasynyń bas dırektory Sergeı Ýsanov. Qazylar alqasynyń tóraıymy - HH ǵasyr baletiniń ańyzyna aınalǵan, Marıınsk teatrynyń etýali, qazirgi kezde «Astana Opera» teatry baletiniń kórkemdik jetekshisi, Reseı halyq ártisi Altynaı Asylmuratova.
Astanadaǵy III Halyqaralyq balet ártisteriniń konkýrsy oǵan qatysýshylar úshin ǵana emes, osy ónerdi súıetin qaýym úshin, Astana turǵyndary men qonaqtary úshin jarqyn oqıǵa, naǵyz bı merekesine aınalary sózsiz.
